އުމުރުން 23 އަހަރުގެ ބްރެޑްލީ ބާކޮލާ އަކީ މި ލިސްޓުން ފާހަގަ ނުކޮށް ދޫކޮށްލެވޭ ވަރަށް ވުރެ މުހިއްމު ކުޅުންތެރިއެކެވެ. ޒަމާނީ ފުޓްބޯޅައިގައި އެންމެ އަވަސް ކުރިއެރުންތަކެއް ހޯދި އެއް ކުޅުންތެރިއަކަށް ބާކޮލާ ވާނެ އެވެ. ބޭބެ އާއެކު އޮލިމްޕިކް ލިޔޯން އިން ތަމްރީނު ވެގެން އައި މި ފޯވާޑް 2023 ގައި ޕީއެސްޖީއަށް ގެނައީ ދިގު މުއްދަތުގެ އިންވެސްޓްމަންޓެއް ގޮތުގަ އެވެ. ނަމަވެސް އޭނާ ކުރިއަރައިގެން ދިޔައީ އުންމީދު ކުރި ވަރަށް ވުރެ އަވަހަށެވެ.

އޭނާގެ ބޭބެ، މަލްކޮމް ބާކޮލާ އަކީ ޓޯގޯ ގައުމީ ޓީމުގެ ގޯލްކީޕަރެވެ. ނަމަވެސް ފްރާންސް އިން އޭނާއަށް ލިބުނު ފުރުސަތުގެ ބޭނުން އޭނާ މި ވަނީ އެންމެ ފުރިހަމައަށް ހިފައިފަ އެވެ. އޭނާ އަކީ އުމުރާ ބަލާފައި ޓެކްޓިކަލީ މާ ބޮޑަށް ވެސް ކޮލިޓީ ކުޅުންތެރިއެކެވެ.

ބާކޮލާ އަކީ ވަރެން ޒަހީރް-އެމެރީ އާއެކު އޮލިމްޕިކް މުބާރާތުގައި ފްރާންސް އަށް ކުޅެން ޕީއެސްޖީން ހުއްދަ ނުދިން ދެ ކުޅުންތެރިންގެ ތެރޭން އެކަކެވެ. އޭނާ އަކީ ޕީއެސްޖީއަށް ކިހާ މުހިއްމު ކުޅުންތެރިއެއް ކަން މިއިން ވެސް އެނގެ އެވެ. ދެ ސީޒަން ތެރޭ ޕީއެސްޖީ އަށް 100 މެޗު ހަމަ ކުރުމަށް ފަހު އޭނާ ވަނީ ފްރާންސް އާއެކު 2024 ވަނަ އަހަރުގެ ޔޫރޯ މުބާރާތް ކުޅެފަ އެވެ. އެންމެ 15 މިނިޓު ކުޅެލަން ލިބުނު ނަމަވެސް އޭނާ ވަނީ، އޭނާއަކީ މުސްތަގުބަލުގައި ނުރައްކާތެރި ކުޅުންތެރިއަކަށް ވާނެ ކަން ދައްކާލައިފަ އެވެ.

ވޯލްޑް ކަޕް ކޮލިފައިންގައި ވެސް ކޯޗު ޑިޑިއޭ ޑިޝޯމްޕްސްގެ ސްކޮޑުގައި މުހިއްމު ދައުރެއް އަދާ ކުރި ބާކޮލާ ވަނީ މިހާތަނަށް ގައުމީ ޓީމަށް ކުޅެދިން 18 މެޗުން ތިން ގޯލު ޖަހައިފަ އެވެ.

ފްރާންސްގެ ގައުމީ ޓީމަށް މިދިޔަ އަހަރު ކުޅެން ފެށި ޑިޒިރޭ ޑޫއޭ ވަނީ މިހާތަނަށް ގައުމީ ޖޯޒީގައި ކުޅެދިން ހަ މެޗުން ދެ ގޯލު ޖަހައިދީފަ އެވެ. އޭނާ ތަމްރީނުވީ ފްރާންސްގެ ރެންސް އެކަޑަމީގަ އެވެ. ޕީއެސްޖީން ޑިޒިރޭ ގެންދިޔައީ 50 މިލިއަނެއްހާ ޔޫރޯގެ އަގަކަށެވެ. އޭނާ ޕީއެސްޖީއަށް ބަދަލުވީ ބެޔާން މިއުނިކަށް ނޫނެކޭ ބުނުމަށް ފަހު އެވެ.

އުމުރުން 20 އަހަރުގެ ޑޫއޭ އަކީ ކޮން މަގާމަކަށް ކުޅޭ ކުޅުންތެރިއެއް ކަން ނިންމަން ކޯޗުންނަށް ވެސް އުނދަގުލެވެ. އެޓޭކިން މިޑްފީލްޑާއި ވިންގަށް އަދި ސެންޓްރަލް މިޑްފީލްޑާއި މިހެން ގޮސް ކޮންމެ މަގާމަކަށް ކުޅުވިއަސް އޭނާ އަންނަނީ އެންމެ ފުރިހަމައަށް ހުނަރު ދައްކާލަމުންނެވެ.

ވަން އޮން ވަން ހާލަތްތަކުގައި ޑޫއޭގެ ކުޅަދާނަކަން ކްލަބް ލެވެލްގައި ވަނީ ފެނިފަ އެވެ. އޭނާ އަކީ އަބަދު އެއް ސްޓައިލަކަށް އޭނާގެ ހުނަރު ގެންގުޅޭ ކުޅުންތެރިއެއް ނޫނެވެ. މީގެ ސަބަބުން ގިނަ ޑިފެންޑަރުންނަށް އޭނާ ހުއްޓުވުން ވެފައި ވަނީ އުނދަގޫ ކަމަކަށެވެ.

ޕީއެސްޖީން މިދިޔަ ސީޒަންގައި ފުރަތަމަ ފަހަރަށް ޗެމްޕިއަންސް ލީގު ކާމިޔާބު ކުރި އިރު، އުސްމާން ޑެމްބެލޭ ނަގާފައި އެ މުބާރާތުގައި ޕީއެސްޖީއަށް އެންމެ ގިނަ ގޯލު ޖަހައިދިނީ އޭނާ އެވެ. މި ސީޒަންގެ ޗެމްޕިއަންސް ލީގު ފައިނަލަށް ގެންގޮސްދިނުމުގައި ވެސް ޑޫއޭ މުހިއްމު ދައުރެއް އަދާ ކުރި އެވެ.

ތަރިން ގިނަ ފްރާންސްގެ ސްކޮޑުގައި ހިމެނިގެން، 20 އަހަރުގެ ވަރެން ޒަހީރް-އެމެރީ ވަނީ މިހާތަނަށް ގައުމީ ޓީމަށް 10 މެޗު ކުޅެދީފަ އެވެ.

އޭނާ ވަނީ 2024 ވަނަ އަހަރު އޮތް ޔޫރޯ މުބާރާތުގެ ސެމީ ފައިނަލް ކުޅުނު ފްރާންސްގެ ސްކޮޑުގައި ހިމެނިފަ އެވެ. އެކަމަކު އެ މުބާރާތުގައި ކުޅެލުމުގެ ފުރުސަތު ނުލިބުނެވެ. އެއަށް ފަހު ފްރާންސްގައި އޮތް އޮލިމްޕިކް ގޭމްސްގައި ގައުމު ތަމްސީލު ކުރަން ލިބުނު ފުރުސަތު އޭނާ އަށް ގެއްލުނީ ޕީއެސްޖީން އޭނާ ގައުމީ ޓީމަށް ދޫ ނުކުރުމުންނެވެ.

އޭރުވެސް އަދި މިހާރު ވެސް އޭނާ އަކީ ފްރާންސްގެ 21 އަހަރުން ދަށުގެ ސްކޮޑްގައި ހިމެނޭ ކުޅުންތެރިއެކެވެ. އެކަމަކު އޭނާގެ އަމާޒަކީ ސީނިއާ ޓީމުގެ ޖާގައެއް ކަށަވަރުކުރުމެވެ.

ގައުމީ ޓީމުން އޭނާއަށް މަދުން ފުރުސަތު ލިބެނީ ކްލަބް ލެވެލްގައި އޭނާއަށް ކުޅެން ލިބޭ ފުރުސަތު މަދު ވުމުން ކަމަށް ފްރާންސްގެ ކޯޗު ޑިޑީއޭ ޑީޝޯމްޕްސް މީގެ ކުރިން ވަނީ ބުނެފަ އެވެ. އަދި އޭނާ އަމިއްލަ ނަފްސަށް އިތުބާރު ކޮށް ކްލަބް ލެވެލްގައި ފުރުސަތު ހޯދާ ވަރަކުން ސީނިއާ ގައުމީ ޓީމުން ވެސް އޭނާ އަށް ފުރުސަތު އޮންނާނެ ކަން ޑިޝޯމްޕްސް ފާހަގަ ކުރި އެވެ. ގިނަ ދުވަސްތަކަކަށް ފަހު މިދިޔަ ނޮވެމްބަރު މަހު ޑިޝޯމްޕްސް ވަނީ އަލުން އޭނާއަށް ގައުމީ ޓީމުން ފުރުސަތު ދީފަ އެވެ. ޑިޝޯމްމްޕްސް ބުނީ އޭނާއަށް އަލުން ފުރުސަތު ދިނީ ކްލަބް ލެވެލްގައި އޭނާ ގަވާއިދުން ފުރުސަތު ހޯދައި މޮޅަށްކުޅޭތީ ކަމަށެވެ.

ޕީއެސްޖީއަށް 200 އެއްހާ މެޗު ކުޅެފައި ވާއިރު، އޭނާ އަކީ ޗެމްޕިއަންސް ލީގުގައި ވެސް އެ ކްލަބުން އެންމެ އިތުބާރު ކުރާ އެއް ކުޅުންތެރިޔާ އެވެ. ފްރާންސްގެ މިޑްފީލްޑުގައި ހިމެނޭ އޮރޭލިއަން ޗުއަމެނީ އާއި އެޑުއާޑޯ ކަމަވިންގާ އަދި އެޑްރިއެން ރަބިއޯ އަށް ވުރެ މި ވަގުތު އެންމެ ނުފޫޒު ގަދަ އެއް މިޑްފީލްޑަރަކީ ޒަހީރް-އެމެރީ އެވެ.

ފްރާންސް އާއެކު 2018 ވަނަ އަހަރު ވޯލްޑް ކަޕް ކާމިޔާބު ކުރި ޑެމްބެލޭ އަށް އޭނާގެ ކެރިއަރުގައި ގިނަ އަނިޔާތަކެއް ލިބިފައި ވީ ނަމަވެސް އޭނާގެ ހުނަރަކަށް ބަދަލެއް ނާދެ އެވެ. ފިޓް ކޮށް ހުރެއްޖެ ނަމަ އޭނާގެ ހުނަރާ މެދު ސުވާލު އުފައްދާނެ ޖާގައެއް ނުދެ އެވެ. އެގޮތުން މިދިޔަ އަހަރު ޕީއެސްޖީއަށް ޗެމްޕިއަންސް ލީގު ކާމިޔާބު ކޮށްދިނުމަށް މުހިއްމު ދައުރެއް އަދާ ކޮށްފަ އެވެ. މި ނިމުނު ސީޒަންގެ ކުރީ ކޮޅު އަނިޔާގައި ދުވަސްތަކެއް ހޭދަ ކުރި ރަން ޖެހުނު ނަމަވެސް އެނބުރި އައިސް ވަނީ އޭނާގެ މޮޅު ކުޅުން ތަކުރާރު ކޮށް، މުހިއްމު ގިނަ ގޯލުތަކެއް ޖަހައިފަ އެވެ. ވޯލްޑް ކަޕްގައި ކުރީ ދެ މުބާރާތުން ވެސް މިހާތަނަށް ގޯލެއް ޖެހިފައި ނުވިއަސް މި އަހަރު އެކަން ބަދަލު ކޮށްލުމަކީ، އެންމެ ފަހުގެ ބެލޮންޑިއޯ އަދި ފީފާ ދި ބެސްޓް އެވޯޑް ހާސިލް ކޮށްފައިވާ ޑެމްބެލޭ އުއްމީދު ކުރާނެ ކަމެކެވެ.

އުމުރުން 27 އަހަރުގެ އެމްބާޕޭ މިހާތަނަށް ކުޅުނު ދެ ވޯލްޑް ކަޕްގައި ވެސް ވަނީ ފައިނަލް ކުޅެފަ އެވެ. ބްރެޒިލްގެ ލެޖެންޑް ޕެލޭއާ އެއްގޮތަށް ވާދަކުރި ފުރަތަމަ މުބާރާތުގައި ވެސް ވަނީ ޗެމްޕިއަންކަން ހޯދައިފަ އެވެ. އެ މުބާރާތުގެ އެންމެ މޮޅު ޒުވާން ކުޅުންތެރިޔަކަށް ހޮވުނީ، އޭރު އުމުރުން އެންމެ 19 އަހަރުގެ އެމްބާޕޭ އެވެ. އެންމެ ފަހުން ކުޅުނު މުބާރާތުގެ ފައިނަލްގައި އާޖެންޓީނާ ކޮޅަށް ހެދި ހެޓްރިކުން ޓީމު މޮޅު ނުވިޔަސް އެ މުބާރާތުގެ ޓޮޕް ސްކޯރާއަކީ އޭނާ އެވެ. އޭނާ ވަނީ ޕެލޭއާ އެއްވަރަށް، ވޯލްޑް ކަޕްގައި މިހާތަނަށް 14 މެޗު ކުޅެ، 12 ގޯލު ޖަހައިފަ އެވެ. ދެން އޮތީ ޕެލޭ ހޯދި އަދަދަށް ވޯލްޑް ކަޕް ކާމިޔާބުކުރުމުގެ އަމާޒަށް ވާސިލްވުމެވެ.

ފްރާންސަކީ ފުޓްބޯޅައިގައި އެންމެ ކާމިޔާބު އެއް ގައުމެވެ. އެގައުމުން 2018 އަދި 1998 ވަނަ އަހަރުގެ ވޯލްޑް ކަޕް ކާމިޔާބުކުރި އެވެ. ޔޫރޯ ފުޓްބޯޅަ މުބާރާތުގެ ޗެމްޕިއަންކަން ވެސް ދެ ފަހަރު ހޯދި އެވެ. ޔޫއެފާ ނޭޝަންސް ލީގުގެ ޗެމްޕިއަންކަމުގެ އިތުރުން ފީފާ ކޮންފަޑެރޭޝަންސް ކަޕަކީ ވެސް ފްރާންސުން ކާމިޔާބުކޮށްފައިވާ މުބާރާތްތަކެވެ. ޔޫތު އުމުރުފުރާތަކަށް ބަލާއިރު، ފްރާންސުން ވަނީ ހުރިހާ އުމުރުފުރައެއްގެ ވޯލްޑް ކަޕް ވެސް ކާމިޔާބުކޮށްފަ އެވެ. މި ޝަރަފް ލިބިފައިވާ ދެ ވަނަ ގައުމީ ބްރެޒިލެވެ.

ފްރާންސަކީ ފުޓްބޯޅައިގައި އަބަދުވެސް ފާހަގަކޮށްލެވޭ މަޝްހޫރު ކުޅުންތެރިން އުފައްދާފައިވާ ގައުމެކެވެ. މިފަހަރުގެ ވޯލްޑް ކަޕާ ކުރިމަތިލާއިރު ވެސް އެގައުމުގައި އޮތީ އެހެން ގައުމުތަކާ އަޅާބަލާއިރު ވަރުގަދަ ސްކޮޑެކެވެ. ވޯލްޑް ކަޕަށް ފްރާންސް ކޮލިފައިވީ، ކޮލިފައިންގައި ބާކީ މެޗެއް އޮއްވައި ގްރޫޕުގެ އެއް ވަނަ ކަށަވަރުކޮށްގެންނެވެ. ހަ މެޗުގެ ތެރެއިން ފަސް މެޗު ކާމިޔާބުކުރިއިރު އެއްވަރުވީ އެއް މެޗުންނެވެ. 

ކޯޗު: ޑިޑިއޭ ޑެޝޯމްޕްސް (57 އަހަރު)

ފްރާންސްގެ ކޯޗަކީ 2018 ވަނަ އަހަރުގެ ވޯލްޑް ކަޕް އެގައުމަށް ކާމިޔާބުކޮށްދީ، 2022 ވަނަ އަހަރުގެ ފައިނަލަށް އެ ޓީމު ގެންގޮސްދިން ކޯޗު ޑިޑިއޭ ޑެޝޯމްޕްސް އެވެ. އޭނާ  ފްރާންސްގެ ކޯޗުކަމާ ހަވާލުވީ 2012 ވަނަ އަހަރު އެވެ. ފްރާންސަށް ވޯލްޑް ކަޕް ކާމިޔާބުކޮށްދިން އަހަރު ފީފާގެ އެންމެ މޮޅު ކޯޗުގެ މަގާމް ޑެޝޯމްޕްސް ހޯދި އެވެ. މިއީ ފްރާންސާ އެކު ޑެޝޯމްޕްސް ނުކުންނާނެ ފަހު މުބާރާތެވެ. ފްރާންސްގެ އިތުރުން ޑެޝޯމްޕްސް ވަނީ ޔުވެންޓަސް، މޮނާކޯ އަދި މާސޭ އަށް ވެސް އިރުޝާދުދީފަ އެވެ.

މުހިއްމު ކުޅުންތެރިން

ތަރިން ގިނަވެ ފްރާންސްގެ ސްކޮޑް ނެގުން ވެސް ކޯޗަށް ވަނީ އުނދަގޫވެފަ އެވެ. ޔޫރަޕްގެ ލީގުތަކުގައި ފްރާންސްގެ ކުޅުންތެރިން އަންނަނީ މޮޅު ކުޅުމެއް ދައްކަމުންނެވެ. ފްރާންސްގެ އެންމެ މަޝްހޫރު ކުޅުންތެރިޔަކީ ކޮލިފައިންގައި އެގައުމަށް ފަސް ގޯލު ކާމިޔާބުކޮށްދީ ތިން ގޯލު ޖަހަން އެހީތެރިވެދިން ކިލިއަން އެމްބާޕޭ އެވެ.

އެޓީމުގެ މައިކަލް އޮލީސޭ އަކީ ވެސް ފާހަގަކޮށްލެވޭ ތަފާތު މޮޅު ކުޅުންތެރިއެކެވެ. މިދިޔަ ސީޒަނުގައި ބަޔާނުގައި އޮލީސޭ ދެއްކި ދުނިޔޭގެ ފެންވަރުގެ ކުޅުމަށް ގިނަ ބައެއްގެ ތައުރީފް ވަނީ ލިބިފަ އެވެ. އަދި، ބެލޮންޑިއޯ އެވޯޑް އެންމެ ފަހުން ހޯދި އޮސްމާނޭ ޑެމްބެލޭ އަކީ ވެސް އެޓޭކުގައި މުހިއްމު ކުޅުންތެރިއެކެވެ.

ޒުވާން ކުޅުންތެރިންނަށް ބަލާއިރު ޕީއެސްޖީގައި ޖާދޫ ދައްކަމުން އަންނަ ޑެސާރޭ ޑުއޭ އާއި އެ ޓީމުގެ ބްރެޑްލީ ބާކޯލާގެ ވިދުން މިފަހަރުގެ ވޯލްޑް ކަޕްގައި ގަދަވާނެކަމަށް ބެލެވެ އެވެ.

ރަޝިޔާގައި 2018 ގައި ބޭއްވި ވޯލްޑް ކަޕަކީ ފުޓްބޯޅައިގެ ދުނިޔެއަށް "ޓެކްނޮލޮޖީގެ އިންގިލާބެއް" ގެނައި މުބާރާތެކެވެ. މިއީ ވީޑިއޯ އެސިސްޓަންޓް ރެފްރީ (ވީއޭއާރް) ބޭނުންކުރަން ފެށި ފުރަތަމަ ވޯލްޑް ކަޕެވެ. ދަނޑުމަތީގައި ހުންނަ ރެފްރީގެ ނިންމުމަށްވުރެ ކެމެރާގެ ނިންމުން ބާރުގަދަވެ، މުޅި މުބާރާތުގެ މިސްރާބު ބަދަލުކޮށްލި އެވެ. މި އާ ނިޒާމާއެކު ރެކޯޑް އަދަދަކަށް ޕެނަލްޓީތައް ދޭން ޖެހުނެވެ.  މުޅި މުބާރާތުގައި ޖުމްލަ 29 ޕެނަލްޓީ ފެނިގެންދިޔަ އެވެ. މިއީ އޭގެ ކުރީގެ މުބާރާތްތަކާ އަޅާބަލާއިރު ވަރަށް ބޮޑު އިތުރުވުމެކެވެ. މީގެ އިތުރުން، ބައިކޮޅަށް ޖެހި ގޯލު ނުވަތަ "އޯން ގޯލް" ގެ އަދަދު 12 އަށް އެރުމަކީ ވެސް މި މުބާރާތް ތާރީހުގެ ތެރެއަށް ވަދެގެންދިޔަ އެއް ސަބަބެވެ.

މި މުބާރާތް އެންމެ ބޮޑަށް ހޫނުވެގެން ދިޔައީ ފުޓްބޯޅައިގެ ބޮޑެތި ބާރުތައް ހައިރާންކުރުވަނިވި ގޮތަކަށް ކަޓައިގެން ދިއުމުންނެވެ. އެންމެ ފަހުގެ ޗެމްޕިއަން ޖަރުމަން، ގުރޫޕް ސްޓޭޖުގެ ފަހު މެޗުގައި ސައުތު ކޮރެއާ އަތުން ބަލިވެ ކެޓިއިރު، މިއީ 1938 ގެ ފަހުން އެ ގައުމު ފުރަތަމަ ބުރުން ކެޓި ފުރަތަމަ ފަހަރެވެ. ހަމައެއާއެކު، ދުނިޔޭގެ އެންމެ ނުފޫޒުގަދަ ދެ ތަރިން ކަމަށްވާ ލިއޮނަލް މެސީ އާއި ކްރިސްޓިއާނޯ ރޮނާލްޑޯ ވެސް އެއް ދުވަހެއްގައި މުބާރާތާ ވަކިވާން ޖެހުނެވެ. އެއާ އެކު އާ ބާރަކަށް ދުނިޔޭގެ ތަށި ލިބޭނެ ކަމުގެ އުންމީދު ބޮޑުވި އެވެ. މި ދަނޑިވަޅުގައި އެންމެ ބޮޑު ހައިރާންކަމެއް ދިނީ ކުޑަކުޑަ ކްރޮއޭޝިއާ އިންނެވެ. އެ ގައުމުން ވަނީ ގަދަ ހިތްވަރާއެކު، ޖެހިޖެހިގެން ތިން މެޗު އިތުރު ވަގުތު ކުޅެގެން މޮޅުވެ، ފުރަތަމަ ފަހަރަށް ވޯލްޑް ކަޕް ފައިނަލަށް ދަތުރުކޮށް ދުނިޔެ ހައިރާންކޮށްލައިފަ އެވެ.

ފޯރިގަދަ ފައިނަލްގައި ކްރޮއޭޝިއާ ބަލިކޮށް 4-2 ގެ ނަތީޖާއަކުން ފްރާންސުން ވަނީ އެ ގައުމުގެ ދެ ވަނަ ވޯލްޑް ކަޕް ތަށި އުފުލާލައިފަ އެވެ. ފްރާންސަށް މި ޝަރަފު ހޯދައިދިނުމުގައި އެންމެ މުހިންމު ދައުރެއް އަދާކުރީ އުމުރުން އެންމެ 19 އަހަރުގެ ކީލިއަން އެމްބާޕޭ އެވެ. އޭނާ ވެފައިވަނީ މަޝްހޫރު ޕެލޭއަށް ފަހު، ވޯލްޑް ކަޕް ފައިނަލެއްގައި ގޯލު ޖެހި ފުރަތަމަ ފުރާވަރު އުމުރުގެ ކުޅުންތެރިޔާ އަށެވެ. ފްރާންސުން ތަށި ހޯދި ނަމަވެސް، މުޅި މުބާރާތުގައި ދެއްކި މޮޅު ކުޅުމާއެކު "ގޯލްޑަން ބޯލް" ހާސިލްކުރީ ކްރޮއޭޝިއާގެ ކެޕްޓަން ލޫކަ މޮޑްރިޗެވެ.

ފްރާންސްގައި 1998 ވަނަ އަހަރު ބޭއްވި ވޯލްޑް ކަޕަކީ ގިނަ ގޮތްގޮތުން ތާރީހީ މުބާރާތެކެވެ. މިއީ ވޯލްޑް ކަޕުގައި ވާދަކުރާ ޓީމުތަކުގެ އަދަދު 24 އިން 32 އަށް އިތުރުކުރި ފުރަތަމަ ފަހަރެވެ. ނަމަވެސް މި މުބާރާތުގެ އެންމެ ބޮޑު ސުރުހީއަކީ ފައިނަލް މެޗުގެ މަދު ގަޑިއިރުތަކެއް ކުރިން ބްރެޒިލްގެ ތަރި ރޮނާލްޑޯއަށް ދިމާވި ހާދިސާ އެވެ. މެޗު ފެށުމުގެ 72 މިނެޓް ކުރިން އާންމުކުރި ޓީމު ލިސްޓުގައި ރޮނާލްޑޯގެ ނަމެއް ނެތެވެ. މުޅި ދުނިޔެ ސިއްސައިގެން ދިޔައީ އެދުވަސްވަރު ދުނިޔޭގައި ހުރި އެންމެ މޮޅު ކުޅުންތެރިޔާ ނުލައި ބްރެޒިލް ފައިނަލް ކުޅެން އުޅުމުންނެވެ. ނަމަވެސް، މެޗު ފެށެން ކުޑަތަންވެފައި ވަނިކޮށް އަލުން ލިސްޓު ބަދަލުކޮށް ރޮނާލްޑޯ ފުރަތަމަ އެގާރައިގައި ހިމެނިއެވެ. ފަހުން އެނގުނު ގޮތުގައި، މެޗުގެ މަދު ގަޑިއިރުތަކެއް ކުރިން ރޮނާލްޑޯއަށް ފިޓް ޖެހި ވަރަށް ބޮޑަށް ބަލިވިއެވެ. އޭނާ ހޮސްޕިޓަލަށް ގެންގޮސް ޓެސްޓުތައް ހެދުމަށްފަހު ދަނޑަށް އައީ މެޗު ފެށެން ކައިރިވެފައި ހުއްޓަ އެވެ.

ރޮނާލްޑޯ ކުޅެން ބޭނުންވާކަމަށް އަމިއްލައަށް ބުނުމުން ކޯޗު މާލިއޯ ޒަގަލޯ އޭނާ ލައިންއަޕަށް އެރުވި އެވެ. ނަމަވެސް މެޗުގައި ރޮނާލްޑޯ ފެނުނީ ވަރަށް ވަރުބަލިކޮށެވެ. ބްރެޒިލްގެ މުޅި ޓީމު އޮތީ އެ ހާދިސާގެ ސަބަބުން ނަފްސާނީ ގޮތުން ބަލިވެފަ އެވެ. މި މުބާރާތުގައި އަލަށް ތައާރަފްކުރި "ގޯލްޑަން ގޯލް" ގަވާއިދުގެ ދަށުން ފުރަތަމަ ލަނޑު ޖެހީ ފްރާންސްގެ ލޯރެން ބްލޮންކް އެވެ. އެއީ ގަދަ 16 ގައި ޕެރަގުއޭއާ ދެކޮޅަށް ކުޅުނު މެޗުގަ އެވެ.

މީގެ އިތުރުން، މި މުބާރާތުގައި ކްރޮއޭޝިއާގެ ދަވޯ ސުކާ 6 ލަނޑު ޖަހައިގެން ރަން ބޫޓު ހޯދިއިރު، އަލަށް ވާދަކުރި ކްރޮއޭޝިއާ ވަނީ ތިން ވަނަ ހޯދައި މުޅި ދުނިޔެ ހައިރާންކޮށްލައިފަ އެވެ. އަދި އިންގްލެންޑުގެ ޒުވާން ތަރި މައިކަލް އޮވެން އާޖެންޓީނާ ކޮޅަށް ޖެހި ހިތްގައިމު ލަނޑަކީ މިއަދާ ހަމައަށްވެސް މީހުން ދައްކާ ވާހަކައެކެވެ. ނަމަވެސް އެ މެޗުގައި އިންގްލެންޑުގެ ޑޭވިޑް ބެކަމްއަށް ދެއްކި ރަތް ކާޑަކީ އޭނާގެ ކެރިއަރުގެ އެންމެ ހިތްދަތި އެއް ހަނދާނެވެ.