ސެނެގޯލް އަކީ އެފްރިކާ ފުޓްބޯޅައިގެ އެންމެ މަޝްހޫރު އެއް ގައުމެވެ. ވޯލްޑް ކަޕްގައި ސެނެގޯލް ވާދަކުރާ މިއީ ހަތަރު ވަނަ ފަހަރެވެ. މީގެކުރިން ވާދަކުރި ތިން ފަހަރު ވެސް އެޓީމުން ރަނގަޅު ވާދައެއްކުރި އެވެ. އެގޮތުން 2002 ވަނަ އަހަރު ކުއާޓާ ފައިނަލުގައި ވާދަކުރިއިރު 2018 ވަނަ އަހަރު ކެޓީ ގްރޫޕް ސްޓޭޖުންނެވެ. ގަތަރުގައި 2022 ވަނަ އަހަރު އޮތް ވޯލްޑް ކަޕްގައި އެގައުމު ކެޓީ ގަދަ 16 އިންނެވެ.

ދުނިޔޭގެ މަޝްހޫރުކަން ސެނެގޯލަށް ކުއްލިއަކަށް ލިބުނީ 2002 ވަނަ އަހަރުގެ ވޯލްޑް ކަޕްގައި، އޭރު ދުނިޔޭގެ ޗެމްޕިއަން ފްރާންސް ބަލިކުރުމުންނެވެ. ފްރާންސް 1-0 އިން ބަލިކުރި އެ މެޗަކީ އެފްރިކާގެ ފުޓްބޯޅަ އަށް ލިބުނު ފަހުރެކެވެ.

ސެނެގޯލް ވަނީ އެފްރިކާ ކަޕް އޮފް ނޭޝަންސްގެ ޗެމްޕިއަންކަން 2021 ވަނަ އަހަރު ހޯދައިފަ އެވެ. އަދި، އެ މުބާރާތުގެ ދެ ވަނަ މަގާމް 2002، 2019 އަދި 2025 ވަނަ އަހަރު ހޯދި އެވެ. މިދިޔަ އަހަރު އޮތް މުބާރާތުގެ ދެ ވަނަ ލިބުނީ އެ ޓީމު ޗެމްޕިއަންކަން ހޯދާފައިވަނިކޮށް އެފްރިކާގެ ސަރަހައްދީ އެސޯސިއޭޝަނުން އެ ތަށި އަތުލުމުންނެވެ. ފައިނަލް މެޗުގެ ފަހު ވަގުތު މޮރޮކޯ އަށް ޕެނަލްޓީއެއް ދިނުމުން ސެނެގޯލް ކުޅުންތެރިން ރެފްރީގެ ނިންމުމާމެދު ހިތްހަމަނުޖެހި، ދަނޑުން ފޭބި އެވެ. އެކަމަކު އެ ޕެނަލްޓީ މޮރޮކޯ އަށް ވައްދައެއްނުލެވުނެވެ. އަދި މެޗުގެ އިތުރު ވަގުތުގައި ސެނެގޯލުން ގޯލެއް ޖަހައި ޗެމްޕިއަންކަން ކަށަވަރުކުރި އެވެ. އެހެންނަމަވެސް އެ ތަށި ހޯދިތާ ދުވަސްތަކެއް ފަހުން، ސެނެގޯލް ޓީމު ދަނޑުން ފޭބި މައްސަލަ ބަލައި އެފްރިކާގެ ފެޑެރޭޝަނުން ނިންމީ މޮރޮކޯ އަށް ޗެމްޕިއަންކަން ދިނުމަށެވެ.

ކޯޗު: ޕާޕޭ ތިއާއު (45 އަހަރު)

ދެހާހުގެ ކުރީކޮޅު ސެނެގޯލްގެ ގައުމީ ޓީމަށް ކުޅުނު ޕާޕޭ ތިއާއު ކޯޗިން ކެރިއަރު ފެށީ 2018 ވަނަ އަހަރު އެވެ. ކޯޗިންގެ ޅަފަތުގައި އަމިއްލަ ގައުމު ގޮވައިގެން ވޯލްޑް ކަޕަށް ނުކުތުމަކީ އޭނާ އަށް އޮތް ޕްރެޝަރެކެވެ. ސެނެގޯލްގެ ކޯޗުކަމާ ތިއާއު ހަވާލުވީ 2024 ވަނަ އަހަރުގެ ޑިސެމްބަރު މަހު އެވެ. އެކަމަކު ގައުމީ ޓީމާއެކު ހޭދަކުރި ކުރު މުއްދަތުގައި ވޯލްޑް ކަޕްގެ ޖާގަ ހޯދައިދީ އެފްރިކާ ކަޕްގެ ފައިނަލަށް އެގައުމު ގެންގޮސްދިނުމަކީ ތިއާއު އަށް ސެނެގޯލް ފެޑެރޭޝަންގެ އިތުބާރު އޮތް ސަބަބެވެ.  

މުހިއްމު ކުޅުންތެރިން

ސެނެގޯލްގައި އޮތީ ތަޖުރިބާ އާއި އަރަމުން އަންނަ ތަރިންނާ އެކު ޔޫރަޕާއި ދެކުނު އެމެރިކާގެ ޓީމުތަކާ ވާދަކުރެވޭ ވަރުގެ ސްކޮޑެކެވެ. އެޓީމުގެ ތަރިއަކީ ނަމޫނާ ކުޅުންތެރިޔާ ސަޑިއޯ މާނޭ އެވެ. ކޮލިފައިންގައި ގައުމީ ޓީމަށް މާނޭ ފަސް ގޯލު ކާމިޔާބުކޮށްދިނެވެ. މާނޭގެ އިތުރުން ޓޮޓެންހަމް ހޮޓްސްޕާގެ ޕަޕޭ މަޓަ ސާ ކޮލިފައިންގައި ހަތަރު ގޯލު ޖެހި އެވެ. ކްރިސްޓަލް ޕެލެސްގެ އިސްމާއިލާ ސާ ތިން ގޯލުގެ ބައިވެރިވުން އޮތެވެ. އެވަޓަން އަށް ކުޅެމުން އަންނަ އިލިމަން އެންޑިޔާއީ އަކީ ސީޒަނުގައި މޮޅު ކުޅުމެއް ދެއްކި ކުޅުންތެރިއެކެވެ. މި ކުޅުންތެރިންނާ އެކު ޓީމަށް ލިބޭ އެންމެ ބޮޑު ހިތްވަރަކީ މިހާރު ސައުދީ ލީގުގެ އަލް-އަހްލީގެ ގޯލު ބަލަހައްޓަމުން އަންނަ ކުޅަދާނަ ގޯލްކީޕަރު އެޑުއާޑް މެންޑީ އެވެ.