ވިންގަށް ކުޅޭ ކުޅުންތެރިންނާ ތަފާތު، އެޓޭކިން މިޑްފީލްޑުގައި ހުނަރުވެރި އަދި ހަލުވި، ކުދި ކޮއްޓުންތަކާއި ނެއްޓުންތަކަށް ޖަމާލް މުސިއާލާ އަކީ އެއް ވަނަ އެވެ. ބެޔާން މިއުނިކްގައި އޭނާ އަންނަނީ، އޭނާ އަކީ ޖަރުމަންގެ އާ ޖީލު ލީޑު ކުރާނެ މިޑްފީލްޑަރު ކަން ސާބިތު ކޮށްދެމުންނެވެ. އޭނާގެ ކުޅުން އެންމެ ވައްތަރީ ސްޕެއިންގެ ލެޖެންޑް އަންޑްރެސް އިނިއެސްޓާއާ ކަމަށް ދެކޭ މީހުން ވެސް މަދެއް ނޫނެވެ.

މީގެ އަހަރެއް ކުރިން، މިދިޔަ ޖުލައި މަހު މުސިއާލާގެ ލިގަމެންޓް ސާޖަރީއެއް ކުރަން ޖެހުމުން އޭނާ ދިގު މުއްދަތަކަށް ކުޅުމާ ދުރުގައި ހުންނަން ޖެހުނެވެ. މިއާ ގުޅިގެން ވޯލްޑް ކަޕް ކޮލިފައިންގެ މެޗުތައް އެކީ އޭނާ އަށް ގެއްލުނެވެ. އޭނާ އަލުން ކުޅުމުގެ ތެރެއަށް އާދެވުނީ މި އަހަރުގެ ޖެނުއަރީ މަހު އެވެ.

އަނިޔާއާ ގުޅިގެން އޭނާ މި އަހަރުގެ ވޯލްޑް ކަޕް ދޫކޮށްލައި، ފިޓްނަސް އަށް މަސައްކަތް ކުރުމަށް، އެ ގައުމުގެ ލެޖެންޑަރީ ގޯލްކީޕަރު އޮލިވާ ހާން ލަފާ ދިން ނަމަވެސް، ކޯޗު ހޫލިއަން ނާގެލްސްމަން ވަނީ އޭނާ އަކީ ޓީމުގެ މުހިއްމު ކުޅުންތެރިއެއް ކަމަށް ބުނެ ވާހަކަ ދައްކައިފަ އެވެ.

ޖަރުމަން ގައުމީ ޓީމަށް މިހާތަނަށް 40 މެޗު ކުޅެދީ، 8 ގޯލު ޖަހައިދީފައިވާ މުސިއާލާ ވަނީ މީގެ ކުރިން 2022 ގައި ގަތަރުގައި އޮތް ވޯލްޑް ކަޕްގައި ކުޅެފަ އެވެ. ނަމަވެސް އެ މުބާރާތް ވީ ޖަރުމަނަށް ނާކާމިޔާބު މުބާރާތަކަށެވެ. ނަމަވެސް މި އަހަރުގެ މުބާރާތުގައި އުމުރުން 23 އަހަރުގެ މުސިއާލާ އަކީ ނަތީޖާ ބަދަލު ކޮށްލާނެ ފަދަ ކުޅުންތެރިއެއް ކަމަށް ނާގެލްސްމަން ދެކެ އެވެ.

ވޯލްޑް ކަޕްގެ ހަތަރު ތައްޓާ އެކު ޖަރުމަނަކީ ބްރެޒިލްގެ ފަހަތުން މުބާރާތުގައި އެންމެ ކާމިޔާބު ގައުމެވެ. އެގައުމުން ވޯލްޑް ކަޕުގެ ޗެމްޕިއަންކަން ހޯދީ 1954، 1974، 1990 އަދި 2014 ވަނަ އަހަރު އެވެ. އެގައުމުން ވަނީ 1966، 1982، 1986 އަދި 2002 ވަނަ އަހަރުގެ ފައިނަލުގައި ވެސް ވާދަކޮށްފަ އެވެ. މި ނަތީޖާތަކާ އެކު އަށް ފަހަރު ވޯލްޑް ކަޕް ފައިނަލުގައި ކުޅުމުގެ ހަމައެކަނި ޝަރަފް ލިބޭ ގައުމަކީ ވެސް ޖަރުމަނެވެ. އަނެއްކޮޅުން 13 މުބާރާތުގެ ސެމީ ފައިނަލުގައި ޖަރުމަނު ވާދަކޮށްފައިވުމަކީ ވެސް ރެކޯޑެކެވެ.

ވޯލްޑް ކަޕަށް ޖަރުމަނު ކޮލިފައިވީ ޔޫރަޕްގެ ކޮލިފައިންގައި ގްރޫޕް އޭގެ އެއް ވަނަ ހޯދައިގެންނެވެ. ކޮލިފައިންގައި ހޯދި އެންމެ ބޮޑު މޮޅަކީ 0-6 އިން ސްލޮވާކިއާ ބަލިކުރުމެވެ. ހަ މެޗުގެ ތެރެއިން ފަސް މެޗު ކާމިޔާބުކުރިއިރު އެއް މެޗުން ބަލިވި އެވެ.

ޖަރުމަނަކީ އަބަދުވެސް ބޮޑެތި މުބާރާތްތަކުގައި ކާމިޔާބީއާ ހަމައަށް ދަތުރުކުރާ ގައުމެކެވެ. އެހެންވެ އެޓީމު ވާދަކުރާ ކޮންމެ މުބާރާތެއްގައި ވެސް ޖަރުމަނު ހިމެނެނީ ފޭވަރިޓުންގެ ތެރޭގަ އެވެ. ތަޖުރިބާ އާއި ޒުވާން ކުޅުންތެރިންގެ ސްކޮޑަކާ އެކު މިއީ ވެސް ޖަރުމަނުގެ ވިދުން އަނެއްކާ ވެސް ފެންނާނެ ފަހަރެއް ކަމަށް ބެލެވެ އެވެ.

ކޯޗު: ހޫލިއަން ނާގަލްސްމަން (38 އަހަރު)

ޖަރުމަނުގެ ކޯޗު ހޫލިއަން ނާގަލްސްމަން ޖަރުމަނު ގައުމީ ޓީމާ ހަވާލުވީ ސެޕްޓެމްބަރު 2023 މަހު އެވެ. އަނިޔާގެ ސަބަބުން އުމުރުން 20 އަހަރުގައި ކުޅުން ހުއްޓާލުމަށް ފަހު ނާގަލްސްމަން ވަނީ 2016 ވަނަ އަހަރު ކޯޗިން ކެރިއަރު ފަށައިފަ އެވެ. ޒުވާން އުމުރުގައި ނާގަލްސްމަން ކޯޗިންގައި ހޯދަމުން އައި ކުރިއެރުމާ އެކު 2021 ވަނަ އަހަރު ދުނިޔޭގެ ރެކޯޑް އަގަކަށް ބަޔާންގެ ކޯޗުކަމަށް ބަދަލުވި އެވެ.

އުމުރުން އެންމެ 38 އަހަރުގައި ދުނިޔޭގެ ފުޓްބޯޅައިގެ އެންމެ ބޮޑު ބާރު ގޮވައިގެން ވޯލްޑް ކަޕަށް ނުކުތުމަކީ ނާގްލްސްމަން އަށް ބޮޑު ޗެލެންޖެކެވެ. އެކަމަކު ޒުވާން ކޯޗު ޖަރުމަނު ސަޕޯޓަރުންނަށް ދޭ ޔަގީންކަމަކީ ޓީމަށްޓަކައި ކުޅޭ ކުޅުންތެރިންނާ އެކު ވޯލްޑް ކަޕްގައި އެގައުމުން ތަފާތު ދައްކާނެ ކަމެވެ.

މުހިއްމު ކުޅުންތެރިން

ޖަރުމަނަކީ ތަރިން ގިނަ ގައުމެކެވެ. ހާއްސަކޮށް ވޯލްޑް ކަޕަކީ އެގައުމުން ތަރިން އުފައްދާ މުބާރާތެކެވެ. މިފަހަރުގެ މުބާރާތަށް ނުކުންނައިރު ޖަރުމަނުގެ އެންމެ މުހިއްމު ކުޅުންތެރިޔަކީ ކެޕްޓަން ޖޯޝުއާ ކިމިޗް އެވެ. ޑިފެންސާއި މިޑްފީލްޑުގައި ވެސް އަބަދުވެސް އެއް ފެންވަރެއްގައި ކުޅޭ ކިމިޗަކީ އިދިކޮޅު ޓީމުތައް އަބަދުވެސް ޖެހިލުންވާ ކުޅުންތެރިއެކެވެ.

ލިވަޕޫލްގައި އަސްލު ފެންވަރު ނުދެއްކުނަސް ގައުމީ ޖާޒީގައި ފްލޯރިއަން ވާޓްޒް އަކީ ތަފާތު ކުޅުންތެރިއެކެވެ. މިފަހަރުގެ ވޯލްޑް ކަޕްގައި ޖަރުމަނުން އުފައްދާ އެޓޭކުތަކުގައި އެންމެ މުހިއްމު ދައުރެއް އަދާކުރާނެ އެއް ކުޅުންތެރިއަކަށް ވާނީ ޔަގީނުން ވެސް ވާޓްޒް އެވެ.

ކޮއްޓުމާއި ނެއްޓުމުގެ ހުނަރާ އެކު ޖަރުމަނުގެ ޖަމާލް މުސިއާލާ ވެސް ހިމެނެނީ އެންމެ އުހުގަ އެވެ. އަނިޔާގެ މައްސަލަތަކާ އެކު ބަޔާން މިއުނިކްގެ ގިނަ މެޗުތަކެއް ނިމުނު ސީޒަނުގައި މުސިއާލާ އަށް ގެއްލުނެވެ. އެކަމަކު އަނިޔާއިން ސަލާމަތްވެ ވޯލްޑް ކަޕުގައި ފުރުސަތު ލިބިއްޖެ ނަމަ ޔަގީނުން ވެސް މުސިއާލާ ވާނީ ތަފާތު ކުޅުންތެރިއަކަށެވެ. މީގެ ކުރިން ވެސް ބައިނަލްއަގްވާމީ މުބާރާތްތަކުގައި މުސިއާލާ ވަނީ އެކަން ސާބިތުކޮށްދީފަ އެވެ.

މި މުބާރާތުގެ އެންމެ ބޮޑު ސިއްސުވާލުމަކީ ސެމީ ފައިނަލުގައި ޖަރުމަނުން ބްރެޒިލްގެ މައްޗަށް ހޯދި 7-1 ގެ ތާރީހީ ކާމިޔާބީ އެވެ. "މައިނީރާޒޯ" ގެ ނަމުން މަޝްހޫރުވި މި މެޗަކީ ބްރެޒިލްގެ ފުޓްބޯޅަ ތާރީހުގައި ކުރިމަތިވި އެންމެ ބޮޑު ލަދުވެތި ބައްޔެވެ. އަމިއްލަ ގައުމުގައި، ސަޕޯޓަރުންގެ ކުރިމަތީގައި ބްރެޒިލްގެ ކުޅުންތެރިންނާއި ރައްޔިތުން ރޮއްވާލުމަށްފަހު ޖަރުމަނު ފައިނަލަށް ދަތުރުކުރީ ފުޓްބޯޅައިގެ ބޮޑު ބާރެއްގެ ގޮތުގައެވެ. ފައިނަލުގައި މާރިއޯ ގޮޓްޒޭ ޖެހި ލަނޑާއެކު އާޖެންޓީނާ ބަލިކޮށް، ޖަރުމަނު ތަށި ހޯދުމާ އެކު އެ ގައުމު ވެގެންދިޔައީ އެމެރިކާ ބައްރުގައި ބޭއްވި މުބާރާތެއް ކާމިޔާބުކުރި ފުރަތަމަ ޔޫރަޕްގެ ގައުމަށެވެ.

މި މުބާރާތަކީ ގިނަ ރެކޯޑުތަކެއް އާވި މުބާރާތެކެވެ. ޖަރުމަނުގެ ފޯވާޑް މިރޮސްލާވް ކްލޯޒާ ވަނީ ބްރެޒިލްގެ ރޮނާލްޑޯގެ ރެކޯޑު މުގުރާލައި، ވޯލްޑް ކަޕް ތާރީހުގައި އެންމެ ގިނަ ލަނޑު ޖެހި ކުޅުންތެރިޔާގެ ޝަރަފް ހޯދައިފަ އެވެ. މީގެ އިތުރުން، އެންމެ ފަހުގެ ޗެމްޕިއަން ސްޕެއިން ގްރޫޕް ސްޓޭޖުން ކަޓައިގެން ދިއުމާއި، ނެދަލެންޑްސްގެ ރޮބިން ވެން ޕާސީ ސްޕެއިން ކޮޅަށް ޖެހި "ފްލައިން ހެޑާ" އަކީ މި މުބާރާތުގެ އެންމެ ފާހަގަކޮށްލެވޭ މަންޒަރުތަކެވެ. އަދި ކޮލަމްބިއާގެ ޖޭމްސް ރޮޑްރިގޭޒް ދެއްކި ތަފާތު މޮޅު ކުޅުމާއެކު އޭނާ ވެގެންދިޔައީ މުޅި ދުނިޔޭގެ ސަމާލުކަން ހޯދި އާ ތަރިއަކަށެވެ.

މި މުބާރާތަކީ ޓެކްނޮލޮޖީގެ ގޮތުންވެސް ކުރިއެރުންތަކެއް ފެނުނު މުބާރާތެކެވެ. ގޯލް-ލައިން ޓެކްނޮލޮޖީ ފުރަތަމަ ފަހަރަށް ވޯލްޑް ކަޕެއްގައި ބޭނުންކުރަން ފެށީ މި އަހަރު އެވެ. މުބާރާތް ނިމުނުއިރު، އާޖެންޓީނާގެ ލިއޮނަލް މެސީއަށް މޮޅު ކުޅުންތެރިޔާގެ މަގާމު ލިބުނު ނަމަވެސް، ތަށީގައި އަތްނުލެވުމުގެ ހިތްދަތިކަން އޭނާގެ މޫނުމަތިން ފެންނަން ހުއްޓެވެ.

އިޓަލީގައި 1990 ވަނަ އަހަރުގެ ބޭއްވި ވޯލްޑް ކަޕަށް ކޮލިފައިވުމަށްޓަކައި ބްރެޒިލާއި ޗިލީ ބައްދަލުކުރި މެޗަކީ މުޅި ދުނިޔެ ސިއްސުވާލި ހާދިސާއެއް ފެނިގެންދިޔަ މެޗެކެވެ. ބްރެޒިލްގެ މަރަކާނާ ސްޓޭޑިއަމްގައި ކުޅުނު މި މެޗުން 1-0 އިން ޗިލީ ބަލިވަމުން ދަނިކޮށް، އެ ގައުމުގެ ކީޕަރު ރޮބާޓޯ ރޮޖާސް ވަނީ ނަތީޖާ ބަދަލުކޮށްލުމަށްޓަކައި ބިރުވެރި "ޑްރާމާ" އެއް ކުޅެފަ އެވެ. މެޗުގެ ފަހު ހާފުގެ ތެރޭގައި ބްރެޒިލްގެ ސަޕޯޓަރަކު އުކާލި އަލިފާން ބޯޅައެއް ރޮޖާސް ކައިރިއަށް ވެއްޓުނު ވަގުތު، އޭނާ ވަނީ ދަނޑުމައްޗަށް ވެއްޓި މޫނުގައި އަތްއަޅައި ތަދުވާކަމަށް ދައްކާފަ އެވެ. ކުޑަވަގުތުކޮޅެއްގެ ތެރޭގައި ރޮޖާސްގެ މޫނުމަތިން ގިނަ އަދަދަކަށް ލޭ އޮހޮރެމުންދިޔަ މަންޒަރު ފެނުމާއެކު، ޗިލީގެ ކުޅުންތެރިން ވަނީ ސަލާމަތީ ސަބަބުތަކަށްޓަކައި މެޗު އިތުރަށް ކުރިއަށް ގެންދަން ދެކޮޅު ހަދައި ދަނޑުން ފައިބައިފަ އެވެ. އެމީހުންގެ މަގުސަދަކީ ބްރެޒިލްގެ ސަޕޯޓަރުންގެ ހަމަލާއަކުން ކުޅުންތެރިޔަކަށް އަނިޔާވިކަމަށް ދައްކައި، ފީފާ މެދުވެރިކޮށް ބްރެޒިލް ބަލިކޮށް މެޗުގެ ތިން ޕޮއިންޓް ހޯދުމެވެ. މުޅި ދުނިޔެއަށް އެ މަންޒަރު ފެނުނީ ބްރެޒިލްގެ ސަޕޯޓަރުންގެ ވަރަށް ނުރައްކާތެރި ހަމަލާއެއްގެ ގޮތުގަ އެވެ.

ނަމަވެސް، ފީފާއިން މި މައްސަލަ ތަހުގީގުކުރުމަށްޓަކައި މެޗުގެ ފޮޓޯތަކާއި ވީޑިއޯތައް ތަފްސީލުކޮށް ބެލިއިރު، ހަގީގަތް ފަޅާއެރި އެވެ. އަލިފާން ބޯޅަ ވެއްޓުނީ ރޮޖާސްއާ ދުރަށެވެ. ފަހުން އެނގުނު ގޮތުގައި ރޮޖާސް ވަނީ އޭނާގެ އަންގި ތެރޭގައި ރޭޒަރު ތިލައެއް ފޮރުވައިގެން ދަނޑަށް އަރައިފަ އެވެ. އަދި އަލިފާން ބޯޅަ ވެއްޓުނު ވަގުތު، އެކަމުގެ ފައިދާ ނަގައި އަމިއްލަ އަތުން މޫނު ކަފާލީ އެވެ. މިކަން ފަޅާއެރުމާއެކު، ފީފާއިން ރޮޖާސް އުމުރަށް ސަސްޕެންޑް ކުރި ނަމަވެސް، ފަހުން 12 އަހަރަށް ބަދަލުކުރި އެވެ. 

މުބާރާތުގެ އެންމެ ހައިރާންކުރުވަނިވި ނަތީޖާއަކީ ގްރޫޕް ސްޓޭޖުގައި ކެމެރޫން އަތުން އާޖެންޓީނާ ބަލިވުމެވެ. ކެމެރޫން މި މުބާރާތުގެ ކުއާޓާ ފައިނަލަށް ދަތުރުކޮށް، ވޯލްޑް ކަޕެއްގެ ކުއާޓާ ފައިނަލަށް ދަތުރުކުރި އެފްރިކާ ބައްރުގެ ފުރަތަމަ ޓީމުގެ ޝަރަފު ހޯދި އެވެ.

މި މުބާރާތުގެ ޗެމްޕިއަންކަން ހޯދީ ފައިނަލުގައި އާޖެންޓީނާ ބަލިކޮށް ހުޅަނގު ޖަރުމަނެވެ. މިއީ "ހުޅަނގު ޖަރުމަނު" ގެ ނަމުގައި އެ ގައުމުން ވާދަކުރި ފަހު މުބާރާތެވެ. ސަބަބަކީ އެ އަހަރުގެ އޮކްޓޯބަރު މަހު ހުޅަނގާއި އިރުމަތީ ޖަރުމަނު އެއްކޮށްލައި، އެއް ގައުމެއްގެ ގޮތުގައި ރަމްޒުކުރަން ފެށުމެވެ. ކުރީގެ މުބާރާތުގެ ޗެމްޕިއަނުންގެ ގޮތުގައި އައި އާޖެންޓީނާއަށް މިފަހަރު ޖެހުނީ ރަނަރަފްގެ މަގާމުން ފުއްދާލާށެވެ.

ހުޅަނގު ޖަރުމަނުގައި 1974 ވަނަ އަހަރުގެ ވޯލްޑް ކަޕަކީ ސިޔާސީ ގޮތުން ދުނިޔެ ދެބައިވެފައި އޮތް ދަނޑިވަޅެއްގައި، ބޭއްވި ފާހަގަކޮށްލެވޭ މުބާރާތެކެވެ. މި މުބާރާތުގެ އެންމެ ހައިރާންކުރުވަނިވި ވަގުތަކީ، ބާލިން ފާރުން ވަކިކުރެވިފައި އޮތް ދެ ގައުމު ކަމަށްވާ ހުޅަނގު ޖަރުމަނާއި އިރުމަތީ ޖަރުމަން ގުރޫޕް ސްޓޭޖުގައި ބައްދަލުކުރަން ޖެހުމެވެ. މުޅި ދުނިޔެ ސިއްސުވާލުމަށްފަހު، މުބާރާތް ބާއްވާ ގައުމު އަދި ފޭވަރިޓުންގެ ގޮތުގައި އޮތް ހުޅަނގު ޖަރުމަންގެ މައްޗަށް 1-0 އިން ކުރި ހޯދީ އިރުމަތީ ޖަރުމަނެވެ. މިއީ މި ދެ ގައުމުގެ ތާރީހުގައިވެސް އެ ދެ ޓީމު ބައްދަލުކުރި ހަމައެކަނި ރަސްމީ މެޗެވެ.

ބްރެޒިލްގެ ސަމްބާ ފުޓްބޯޅަ އަށް ފަނޑުކަން އޮތީ އައިސްފަ އެވެ. ބްރެޒިލްގައި އުފެއްދި އެންމެ މޮޅު ކުޅުންތެރިޔާ ޕެލޭ ގައުމީ ޓީމަށް ކުޅުން ހުއްޓާލުމުން މުބާރަތަށް ދިޔައީ އޭނާ ނުލަ އެވެ. ސަމްބާ ފުޓްބޯޅަ ފަނޑުވި އިރު ވިދާލީ ނެދަލެންޑްސްއިން ތައާރަފު ކުރި "ޓޯޓަލް ފުޓްބޯޅަ" އެވެ. ޔޯހާން ކްރައިފްގެ ކެޕްޓަންކަމުގެ ދަށުން ނެދަލެންޑްސް އިން ކުޅުނު ހިތްގައިމު ކުޅުމާއެކު، އެ ޓީމު ފައިނަލަށް ދިޔައީ ތަށި ނަގާނެ ކަމުގެ ފުރިހަމަ ޔަގީންކަމާ އެކުއެވެ. ފައިނަލް މެޗު ފެށިގެން ފުރަތަމަ މިނެޓުގައި، ހުޅަނގު ޖަރުމަންގެ ކުޅުންތެރިއެއްގެ ފައިގައި ބޯޅަ ޖެހުމުގެ ކުރިން ނެދަލެންޑްސް އިން ޕެނަލްޓީއެއް ހޯދައި ލީޑު ނެގި އެވެ. ނަމަވެސް، ހުޅަނގު ޖަރުމަންގެ ހިތްވަރުގަދަ ޑިފެންޑަރު ފްރާންޒް ބެކަންބާވާ އާއި ގޯލް މެޝިން ގާޑް މުލާގެ ހުނަރުން 2-1 އިން މެޗު އަނބުރާލައި، ހުޅަނގު ޖަރުމަނުން ދެ ވަނަ ފަހަރަށް ވޯލްޑް ކަޕް ތަށި އުފުލާލި އެވެ.

މި މުބާރާތަކީ މިހާރު މި ބޭނުންކުރާ ފީފާ ވޯލްޑް ކަޕް ޓްރޮފީ ފުރަތަމަ ފަހަރަށް ބޭނުންކުރަން ފެށި އަހަރެވެ. 1970 ގައި ބްރެޒިލުން ކުރީގެ ތަށި މިލްކުކުރުމުން، އަލަށް ތައްޔާރުކުރި ރަން ތަށި ފުރަތަމަ ފަހަރަށް އުފުލާލުމުގެ ޝަރަފު ލިބުނީ ހުޅަނގު ޖަރުމަންގެ ކެޕްޓަން ބެކަންބާވާ އަށެވެ.

ސްވިޒަލެންޑްގައި 1954 ވަނަ އަހަރުގެ ވޯލްޑް ކަޕަކީ ޓީވީގެ ފެށުމާއި ލަނޑުގެ ރެކޯޑުތަކުން ފުޓްބޯޅަ އާ އުސްމިނަކަށް ގެންގޮސްދިން މުބާރާތެކެވެ. ނަމަވެސް، މި އުފާވެރިކަމުގެ ތެރެއިން 'ކަޅު ސަފުހާއެއް' ގޮތުގައި ފާހަގަވެގެންދިޔައީ ހަންގޭރީ އާއި ބްރެޒިލްގެ ކުރިމަތިލުމުގައި ފެނުނު އަނިޔާވެރި މާރާމާރީ އެވެ.

ސްވިޒަލެންޑަށް މި މުބާރާތް ބޭއްވުމުގެ ފުރުސަތު ފީފާއިން ދިނީ ބްރެޒިލަށް 1950ގެ މުބާރާތް ބާއްވަން ފުރުސަތު ދިން ކޮންގްރެސްގަ އެވެ. އެހެންކަމުން، މުބާރާތަށް ތައްޔާރުވުމަށް ސްވިޒަލެންޑަށް 8 އަހަރުގެ ދިގު މުއްދަތެއް ލިބުނެވެ. މިއީ އެހާތަނަށް ވޯލްޑް ކަޕެއް ބޭއްވުމަށް ގައުމަކަށް ތައްޔާރުވާން ލިބުނު އެންމެ ދިގު މުއްދަތެވެ.

މި މުބާރާތް ފެށުނުއިރު، ދުނިޔޭގެ ފުޓްބޯޅައިގެ އެންމެ ނުފޫޒުގަދަ ބާރަކީ ހަންގޭރީ އެވެ. ލެޖެންޑަރީ ފެރެންކް ޕުސްކަސް ފަދަ ތަރިންނާއެކު، އޮލިމްޕިކް ރަން މެޑަލް ހޯދާފައިވާ ހަންގޭރީ ޓީމު މުބާރާތަށް އައީ އެންމެ ފޭވަރިޓުންގެ ގޮތުގަ އެވެ.

މި މުބާރާތަކީ ވޯލްޑް ކަޕްގެ ތާރީހުގައި ލަނޑު ޖެހުމުގެ ރެކޯޑުތައް މުގުރާލި އަހަރެވެ. މުޅި މުބާރާތުގައި މެޗަކަށް އެވްރެޖްކޮށް 5.38 ލަނޑު ޖަހާފައިވާއިރު، މިއީ މިއަދާ ހަމައަށް ވެސް އެއްވެސް ވޯލްޑް ކަޕަކަށް މުގުރާލެވިފައި ނުވާ ރެކޯޑެކެވެ. މީގެ ތެރެއިން އޮސްޓްރިއާ އާއި ސްވިޒަލެންޑް ބައްދަލުކުރި ކުއާޓާ ފައިނަލް މެޗު 7-5 އިން ނިމުނުއިރު، މިއީ ވޯލްޑް ކަޕް މެޗެއްގައި އެންމެ ގިނަ ލަނޑު (12 ލަނޑު) ފެނުނު މެޗެވެ. ނަމަވެސް ކުޅިވަރުގެ ރޫހާ ހިލާފު "ބެޓްލް އޮފް ބާން" ގެ ނަމުން މަޝްހޫރުވި ހަންގޭރީ އާއި ބްރެޒިލްގެ މެޗުގައި ހިނގި ވަރުގަދަ މާރާމާރީއަކީ މި މުބާރާތުގެ ކަޅު ސަފުހާއެކެވެ. މެޗުގެ ފޯރިގަދަވެ، ކުޅުންތެރިންގެ މެދުގައި އުފެދުނު ނުތަނަވަސްކަން ކޮންޓްރޯލުން ނެއްޓި، އިނގިރޭސި ރެފްރީ އާތުރް އެލިސްއަށް ޖެހުނީ ތިން ކުޅުންތެރިއަކަށް ރަތް ކާޑު ދައްކައި ދަނޑުން ފޮނުވާލާށެވެ. ނަމަވެސް، މައްސަލަ އެންމެ ބޮޑުވީ މެޗު ނިމުނު ފަހުންނެވެ.

ހަންގޭރީން 4-2 އިން މެޗު ކާމިޔާބުކޮށް ސެމީ ފައިނަލަށް ދަތުރުކުރި ނަމަވެސް، މެޗު ނިމުމާއެކު ދެ ޓީމުގެ ކުޅުންތެރިންނާއި އޮފިޝަލުން ޑްރެސިން ރޫމް ކައިރިން ބައްދަލުވެ، ބޮޑު ތަޅާފޮޅުމެއް ފެށުނެވެ. މި މާރާމާރީގައި ބޫޓާއި، ފެންފުޅި އަދި އެހެނިހެން ސާމާނު ހަތިޔާރުގެ ގޮތުގައި ބޭނުންކުރިއިރު، އޭރު އިންޖަރީގައި ހުރި ހަންގޭރީގެ ތަރި ފެރެންކް ޕުސްކަސް ވެސް ބްރެޒިލް ކުޅުންތެރިއަކަށް ފުޅިއަކުން ހަމަލާދިން ކަމަށް ބުނެވެ އެވެ. ބައެއް ކުޅުންތެރިންނަށް ބޮޑެތި އަނިޔާތަކެއް ލިބި، ލޭއޮހޮރުވުންތައް ހިނގި މި ހާދިސާއަކީ މުޅި ދުނިޔެ ސިއްސުވާލި، އަދި ވޯލްޑް ކަޕްގެ ޝަރަފަށް އުނިކަން ގެނުވި ވަރަށް ހިތްދަތި ހާދިސާއެކެވެ.

މުބާރާތުގެ އެންމެ ބޮޑު ސިއްސުމަކީ ހުޅަނގު ޖަރުމަނުގެ ކާމިޔާބީ އެވެ. ދެ ވަނަ ބޮޑު ހަނގުރާމައަށް ފަހު ވޯލްޑް ކަޕުން ބާކީކޮށްފައި އޮތް ޖަރުމަން، ހުޅަނގު ޖަރުމަނުގެ ނަމުގައި އެނބުރި އައިސް ފައިނަލުގައި ހަންގޭރީ ބަލިކުރުމަކީ ދުނިޔެ ސިއްސުވާލި ކަމެކެވެ. ޖަރުމަނަށް މި މެޗު ކާމިޔާބު ކުރުމަށް އެޑިޑާސްގެ "ސްކްރޫ-އިން" ބޫޓުގެ އެހީތެރިކަން ލިބުނުއިރު، މިއީ ފުޓްބޯޅަ ތާރީހުގައި "ޖާދޫއެއް" ނުވަތަ އާދަޔާހިލާފް ކަމެއްގެ ގޮތުގައި މިއަދުވެސް ސިފަކުރާ ނަތީޖާއެކެވެ.