ދެކުނު އެމެރިކާ އަކީ އަބަދުވެސް ޒުވާން ކުޅުންތެރިންނަށް އިތުބާރު ކުރާ ސަރަހައްދެކެވެ. އިކުއެޑޯގެ ކެންޑްރީ ޕާއޭޒް ވަނީ އުމުރުން އެންމެ 16 އަހަރުގައި ސީނިއާ ގައުމީ ޓީމާ އެކު ވޯލްޑް ކަޕް ކޮލިފައިންގައި ކުޅެން ފަށައި، ގޯލު ޖަހައިފަ އެވެ. އަދި ފަހުން އޮތް ކޮޕާ އެމެރިކާގައި ވެސް އޭނާ ގޯލު ޖެހި އެވެ.

އޭނާއަށް ފުރަތަމަ ފަހަރަށް ގައުމީ ޓީމުން ފުރުސަތު ލިބުމާ އެކު ޗެލްސީން ވަނީ އޭނާ 18 އަހަރު ވުމުން އެ ކްލަބާ ގުޅޭ ގޮތަށް 2023 ގައި ހަމަޖައްސައިފަ އެވެ. މިދިޔަ އަހަރު އޭނާ ޗެލްސީއާ ގުޅުމަށް ފަހު ސީޒަންގެ ކުރީކޮޅު ވަނީ ލޯނުގައި ފްރާންސްގެ ސްޓްރާސްބޯގަށް ކުޅެފަ އެވެ. އެއަށް ފަހު މިދިޔަ ޖެނުއަރީ މަހު ވަނީ އެއް އަހަރުގެ ލޯނެއްގައި އާޖެންޓީނާގެ ރިވަ ޕްލޭޓަށް ބަދަލު ވެފަ އެވެ.

ފުރަތަމަ ގޯލާ އެކު ޕާއޭޒް ވެގެން ދިޔައީ އިކުއެޑޯ ފުޓްބޯޅައިގެ އުންމީދަށެވެ. ޓީމަށް މުހިއްމު ކުޅުންތެރިއަކަށްވެ، މިހާރު އުމުރުން 19 އަހަރުގެ ކުޅުންތެރިޔާ ވަނީ މިހާތަނަށް ގައުމީ ޓީމަށް 24 މެޗު ކުޅެދީފަ އެވެ.

ޕާއޭޒް ވެގެން ދާނީ ދުނިޔޭގެ ގިނަ ބާރުތައް ވަށައިގެންވާ އިކުއެޑޯއިން، ވޯލްޑް ކަޕް ފަދަ ބޮޑެތި މުބާރާތްތަކުގައި ކުރާ އުންމީދުތަކަށް ލިބޭ ބޮޑު ހިތްވަރަކަށެވެ.

މިއީ ވޯލްޑް ކަޕްގައި އިކުއެޑޯ ވާދަކުރާ ފަސް ވަނަ ފަހަރެވެ. ވޯލްޑް ކަޕް ކޮލިފައިންގައި އެގައުމު ވާދަކުރަން ފެށީ 1962 ވަނަ އަހަރުން ފެށިގެންނެވެ. ފުރަތަމަ ވޯލްޑް ކަޕުން އެގައުމަށް ފުރުސަތު ލިބުނީ ކޮލިފައިންގައި ވާދަކުރަން ފެށިތާ ބައިގަރުނު ފަހުން 2002 ވަނަ އަހަރު އެވެ. އެ މުބާރާތުގެ އިތުރުން 2006، 2014 އަދި 2022 ވަނަ އަހަރުގެ ވޯލްޑް ކަޕްގައި އެގައުމު ވާދަކުރި އެވެ. އެންމެ ކުރިއަށް ދެވުނީ 2006 ވަނަ އަހަރު ގަދަ 16 އާ ހަމައަށެވެ.

ވޯލްޑް ކަޕްގެ ޖާގަ އިކުއެޑޯ ހޯދީ ދެކުނު އެމެރިކާ ސަރަހައްދުން އާޖެންޓީނާގެ ފަހަތުން ގްރޫޕުގެ ދެ ވަނަ ހޯދައިގެންނެވެ. ކޮލިފައިންގައި ކުޅުނު 18 މެޗުން އެގައުމަށް 29 ޕޮއިންޓް ލިބުނެވެ. ކޮލިފައިން ބުރު އެ ގައުމުން ފަށަން ޖެހުނީ ވެސް އުނިކޮށްފައިވާ ތިން ޕޮއިންޓާ އެކު އެވެ. ތިން ޕޮއިންޓް އުނިކުރީ އެޓީމުގެ ބިރޮން ކަސްޓީލޯއާ ގުޅޭ ނުބައި ލިޔެކިޔުންތަކެއް ހުށަހެޅުމުން ކޯޓް އޮފް އާބިޓްރޭޝަން (ސީއޭއެސް) އިން ބެލި މައްސަލައަކަށް ފަހު އެވެ. އުނދަގޫ ހާލަތެއްގައި އޮވެ ކޮލިފައިން ފެށީ ނަމަވެސް އެޓީމުން ނަތީޖާ ނެރުނީ ޑިފެންސިވް ވަރުގަދަ ކުޅުމެއް ދައްކައިގެންނެވެ. ކޮލިފައިންގެ 18 މެޗުގައި އެ ގައުމު ކޮޅަށް ވަނީ އެންމެ ފަސް ގޯލެވެ. މިއީ ކޮލިފައިންގައި ދެކުނު އެމެރިކާގެ ރެކޯޑެކެވެ.

ކޯޗު: ސެބަސްޓިއަން ބެކަކެސީ (45 އަހަރު)

ޒުވާން އުމުރުގައި ފުޓްބޯޅަ ކުޅެން ފަށައި، އެންމެ މަތީ ފެންވަރުގެ ކުޅުންތެރިއަކަށް ނުވެވޭނެކަމަށް ގަބޫލުކުރެވި ބެކަކަސީ ފުޓްބޯޅަ ކުޅުން ހުއްޓާލި އެވެ. ދެން އޭނާގެ ޝައުގުވެރިކަން އުފެދުނީ ކޯޗިންގައި ކުރިއަށް ދިއުމަށެވެ. އޭނާ ކޯޗިން ދަތުރު ފެށީ 2003 ވަނަ އަހަރު އެވެ. އޭގެ ފަހުން މި ހިސާބަށް އައިއިރު ފާހަގަކޮށްލެވޭ ކުރިއެރުންތައް ވަނީ ހޯދައިފަ އެވެ. އެގޮތުން ޗިލީގެ އެސިސްޓެންޓް ކޯޗުކަމާއި އާޖެންޓީނާގެ އެސިސްޓެންޓް ކޯޗުކަން ކުރުން ހިމެނެ އެވެ.

ކޮލިފައިންގެ މެދުތެރެއިން އިކުއެޑޯއާ ހަވާލުވި ބެކަކެސީ ވަނީ ބާކީ ދެ މެޗު އޮއްވައި އިކުއެޑޯ ވޯލްޑް ކަޕަށް ކޮލިފައިކޮށްދީފަ އެވެ.

މުހިއްމު ކުޅުންތެރިން: 

އިކުއެޑޯގެ އެންމެ މަގުބޫލު އަދި އެންމެ މުހިއްމު ކުޅުންތެރިޔަކީ އެނާ ވެލެންސިއާ އެވެ. ކޮލިފައިންގައި ވެލެންސިއާ ވަނީ އެގައުމަށް ހަ ގޯލު ކާމިޔާބުކޮށްދީފަ އެވެ. ކޮލިފައިންގައި އެގައުމުން އާޖެންޓީނާ ބަލިކުރީ ވެސް ވެލެންސިއާގެ ގޯލަކުންނެވެ.

ޔޫރަޕްގައި ކުޅޭ ކުޅުންތެރިންގެ ތެރެއިން ޗެލްސީގެ މޮއިސެސް ކައިސީޑޯ އަކީ އިކުއެޑޯގެ މެދުތެރޭގެ އިންޖީނެވެ. އެ ޓީމުގެ ޑިފެންސްގައި ޕީއެސްޖީ އަށް ކުޅޭ ވިލިއަން ޕަޗޯ އާއި އާސެނަލަށް ކުޅޭ ޕިއޭރޯ ހިންކެޕިއޭ ފާހަގަކޮށްލެވެ އެވެ. ޒުވާން ކުޅުންތެރިންނަށް ބަލާއިރު މިފަހަރުގެ ވޯލްޑް ކަޕްގައި ގިނަ ބައެއްގެ ލޯ އަމާޒުވާނެ އެއް ކުޅުންތެރިޔަކީ އަންނަ ސީޒަނުގައި ޗެލްސީން ފެންނާނެ ކެންޑްރީ ޕައެޒް އެވެ.