ވޯލްޑް ކަޕްގެ ތާރީހީ ފުރަތަމަ މުބާރާތް ހޯސްޓުކޮށް އެ މުބާރާތުގެ ޗެމްޕިއަންކަން ހޯދީ އުރުގުއޭ އިންނެވެ. އޭގެފަހުން 1950 ވަނަ އަހަރު ބްރެޒިލްގައި އޮތް ވޯލްޑް ކަޕް ވެސް އެގައުމުން ކާމިޔާބުކުރި އެވެ. އުރުގުއޭގެ ރަން ޖީލުން ކާމިޔާބީތައް ހޯދިނަމަވެސް، އޭގެފަހުން އެޓީމަށް ވޯލްޑް ކަޕްގައި މާބޮޑު ކުރިއެރުމެއް ނުލިބެ އެވެ. ވޯލްޑް ކަޕްގެ 15 ވަނަ މުބާރާތާ އުރުގުއޭ ކުރިމަތިލާއިރު އެންމެ ފަހުގެ ހަތަރު ވޯލްޑް ކަޕްގައި ވެސް އެގައުމު ވަނީ ވާދަކޮށްފަ އެވެ. އަދި ވޯލްޑް ކަޕަށް ގަރުނެއްވާ މުނާސަބަތު 2030 ވަނަ އަހަރު ފާހަގަކުރާއިރު، މެޗް ހޯސްޓްކުރާ ގައުމުގެ ހައިސިއްޔަތުން އެ މުބާރާތުން އުރުގުއޭ މިހާރުވެސް ވަނީ ޖާގަ ލިބިފަ އެވެ.

އުރުގުއޭގެ އިތުރު ކާމިޔާބީތަކަށް ބަލާއިރު، އޮލިމްޕިކްގެ ގޯލްޑް މެޑަލް ދެ އަހަރު ހޯދުމާއި ސަރަހައްދީ މުބާރާތް، ކޮޕާ އެމެރިކާގެ ޗެމްޕިއަންކަން 15 ފަހަރު ހޯދުން ހިމެނެ އެވެ.

ވޯލްޑް ކަޕަށް އުރުގުއޭ ކޮލިފައިވީ ދެކުނު އެމެރިކާ ސަރަހައްދުން ހަތަރު ވަނަ ހޯދައިގެންނެވެ. ކޮލިފައިންގައި ކުޅުނު 18 މެޗުގެ ތެރެއިން ހަތް މެޗުން މޮޅުވެ ހަތް މެޗު އެއްވަރުވި އެވެ. އަދި ހަތަރު މެޗުން ވަނީ ބަލިވެފަ އެވެ. ކޮލިފައިންގައި 22 ގޯލު ޖެހިއިރު އެޓީމު ކޮޅަށް 12 ގޯލު ވަނެވެ.

ކޯޗު: މާސެލޯ ބިއެލްސާ (70 އަހަރު) 

އާޖެންޓީނާ އަށް އުފަން ކޯޗު މާސެލޯ ބިއެލްސާ އަކީ ފުޓްބޯޅައިގައި ތާރީހުގައި އެންމެ ނުފޫޒު ގަދަ އެއް ކޯޗެކެވެ. ހޯދާފައިވާ ތަށިތަކަށް ވުރެ ބިއެލްސާ މަޝްހޫރުވެފައިވަނީ ހައި ޕްރެސިން ފުޓްބޯޅައެއް ކުޅުވާ މޮޅު ކޯޗެއްގެ ގޮތުގަ އެވެ. މަޝްހޫރު ކޯޗު ވަނީ މީގެކުރިން އާޖެންޓީނާ އާއި ޗިލީ އަށް އިރުޝާދުދީފަ އެވެ. އަދި ޔޫރަޕްގެ މަޝްހޫރު ކްލަބްތަކަށް ވެސް އިރުޝާދުދިނެވެ.

މުހިއްމު ކުޅުންތެރިން: 

އުރުގުއޭގެ ހިތަކީ ރެއާލް މެޑްރިޑްގެ މިޑްފީލްޑަރު ފެޑެރިކޯ ވަލްވާޑޭ އެވެ. ވަލްވާޑޭ އަކީ ދުނިޔޭގައި ފާހަގަކޮށްލެވޭ މިޑްފީލްޑަރެކެވެ. ވިސްނުންތެރިކަމާ އެކު ވަރުބަލިކަމެއް ނެތި އޭނާ ދައްކާ ކުޅުމަކީ އުރުގުއޭގެ ގައުމީ ޓީމަށް ލިބޭ ހިތްވަރެކެވެ. ވަލްވާޑޭގެ އިތުރުން ޑާވިން ނޫނޭޒް އަކީ އެޓޭކުގައި މުހިއްމު ކުޅުންތެރިއެކެވެ. އަދި، ދެ ޑިފެންޑަރުން ކަމަށްވާ ރޮނާލްޑް އަރައުހޯ އަދި ހޯސޭ މާރިޔާ ހިމެނޭޒް އަކީ ތަޖުރިބާގެ ގޮތުން އުރުގުއޭގައި ފާހަގަކޮށްލެވޭ ކުޅުންތެރިންނެވެ.

ބްރެޒިލްގައި 1950 ވަނަ އަހަރުގެ ވޯލްޑް ކަޕަކީ ދެ ވަނަ ބޮޑު ހަނގުރާމައިގެ މެދުކެނޑުމަށް ފަހު ބޭއްވުނު ފުރަތަމަ މުބާރާތެވެ. މި މުބާރާތް ބާއްވާނެ ގައުމެއްގެ ގޮތުގައި ބްރެޒިލް ކަނޑައެޅީ 1946 ވަނަ އަހަރުގެ ފީފާ ކޮންގްރެސްގަ އެވެ. ހަގީގަތުގައި ހަނގުރާމައިގެ ކުރިން 1942 ވަނަ އަހަރުގެ މުބާރާތަށް ބްރެޒިލާއި ޖަރުމަން އަދި އާޖެންޓީނާއިން ބިޑް ކުރި ނަމަވެސް، ހަނގުރާމައަށް ފަހު ދުނިޔޭގެ މަސްރަހު އޮތް ގޮތުން 1946 ގައި މުބާރާތް ބާއްވަން ހަވާލުވާނެ އެހެން ގައުމެއް ނުވުމުން، އެ ބުރަ ޒިންމާ އުފުލައި މުޅި ދުނިޔެއަށް ފުޓްބޯޅައިގެ އުއްމީދު އައުކޮށްދިނީ ބްރެޒިލުންނެވެ.

މި މުބާރާތުން ފެނިގެން ދިޔައީ ހަނގުރާމައަށްފަހު ސިޔާސީ ގޮތުން ދުނިޔެ ބައިބައިވެފައި އޮތް މަންޒަރެވެ. ހަނގުރާމައިގައި ހިންގި ޖަރީމާތަކާ ގުޅިގެން ޖަރުމަނާއި ޖަޕާން މުބާރާތުން ސަސްޕެންޑް ކުރިއިރު، ސޯވިއެޓް ޔޫނިއަނާއި ހަންގޭރީ ފަދަ ގައުމުތަކުން ސިޔާސީ ސަބަބުތަކަށްޓަކައި މުބާރާތުން ވަކިވި އެވެ. މީގެ އިތުރުން އާޖެންޓީނާއިން ބްރެޒިލްގެ ފުޓްބޯޅަ ފެޑެރޭޝަނާ ޖެހުނު މައްސަލަތަކެއްގައި ވަކިވިއިރު، އިންޑިއާއިން މުބާރާތުން ވަކިވީ ދަތުރުގެ ހަރަދު ބޮޑުވުމާއި ތައްޔާރުވާން ވަގުތު ނެތުމުގެ ސަބަބުންނެވެ.

އޭރުގެ ޗެމްޕިއަން އިޓަލީ މުބާރާތަށް އައީ 1949 ގެ "ސުޕާގާ" މަތިންދާބޯޓު އެކްސިޑެންޓުގައި އެ ގައުމުގެ އެންމެ މޮޅު ކުޅުންތެރިން މަރުވުމުގެ ހިތާމައިގަ އެވެ. އެ ބިރުވެރިކަމުގެ ސަބަބުން އިޓަލީ ޓީމުން ބްރެޒިލަށް ދަތުރުކުރީ ކަނޑު މަގުންނެވެ.

މި މުބާރާތުގެ އެންމެ އާދަޔާހިލާފު އެއް ކަމަކީ މިއީ ރަސްމީކޮށް "ފައިނަލް މެޗެއް" ނެތް ހަމައެކަނި ވޯލްޑް ކަޕަށް ވުމެވެ. މުބާރާތުގެ ފޯމެޓް އޮތްގޮތުން، ޗެމްޕިއަންކަން ކަނޑައެޅީ އެންމެ ފަހު ބުރުގައި ވާދަކުރި ހަތަރު ޓީމުގެ މެދުގައި ކުޅެވުނު ލީގު އުސޫލުންނެވެ. މި މުބާރާތުގައި ފެނުނު އެންމެ ބޮޑު ސިއްސުމަކީ، ފުޓްބޯޅައިގެ ބާނީން ކަމަށްވާ އިނގިރޭސި ވިލާތް، އޭރު އެއްވެސް ތަޖުރިބާއެއް ނެތް އެމެރިކާ އަތުން 1-0 އިން ބަލިވުމެވެ. މި ނަތީޖާގެ ޚަބަރު އިނގިރޭސި ވިލާތުގެ ބައެއް ނޫސްތަކަށް ލިބުމުން، އެއީ ލިޔުމުގެ ކުށެއް ކަމަށް ހީކޮށް އިނގިރޭސިން 10-1 އިން މޮޅުވީ ކަމަށް ވެސް ބައެއް ނޫސްތަކުގައި ޖެހި އެވެ.

ކުޅިވަރުގެ ގޮތުން ބަލާއިރު، މިއީ އުރުގުއޭ އެނބުރި އައިސް ދުނިޔެ ސިއްސުވާލި އަހަރެވެ. ކުރީގެ ދެ މުބާރާތުގައި ބައިވެރިނުވި އުރުގުއޭއިން، މުބާރާތް ނިންމުމަށް ކުޅުނު ފަހު މެޗުގައި ބްރެޒިލްގެ މައްޗަށް ކުރި ހޯދައި، ދެ ވަނަ ފަހަރަށް ވޯލްޑް ކަޕްގެ ޗެމްޕިއަންކަން ހޯދި އެވެ. ބްރެޒިލްގެ މަރަކަނާ ސްޓޭޑިއަމްގައި ގާތްގަނޑަކަށް ދެލައްކައެއްހާ ސަޕޯޓަރުންގެ ކުރިމަތީގައި ކުޅުނު މި މެޗަކީ، ފުޓްބޯޅަ ތާރީހުގައި "މަރަކަނާޒޯ" ގެ ނަމުން މަޝްހޫރުވި، ބްރެޒިލްގެ ސަޕޯޓަރުން މިއަދުވެސް ހިތާމައާއެކު ހަނދާންކުރާ މެޗެކެވެ. މިއީ މުޅި ބްރެޒިލް ރޮއްވާލައި، އެ ގައުމުގެ ފުޓްބޯޅަ ތާރީހު ހިތްދަތިކޮށްލި މެޗެވެ.

ފީފާ ވޯލްޑް ކަޕް 1930 ވަނަ އަހަރު އުރުގުއޭގައި ބާއްވަން އެ ގައުމަށް ފުރުސަތު ދިނީ މުހިންމު ދެ ސަބަބަކާ ގުޅިގެންނެވެ. ފީފާއިން 1914 ވަނަ އަހަރު އޮލިމްޕިކްސްގެ ފުޓްބޯޅަ އިވެންޓް އިންތިޒާމު ކުރަން ފެށި ފަހުން، އޮލިމްޕިކްސްގެ ޖެހިޖެހިގެން ދެ މުބާރާތް އުރުގުއޭއިން ކާމިޔާބު ކުރުމުން، އޭރު ބެލިފައި އޮތީ އުރުގުއޭ އަކީ ދުނިޔޭގެ ފުޓްބޯޅައިގައި އެންމެ ކާމިޔާބު ގައުމުގެ ގޮތުގަ އެވެ. އަނެއް ކަމަކީ އުރުގުއޭގެ މިނިވަންކަމަށް 100 އަހަރު ފުރުން ފާހަގަކުރަން އެ ގައުމުން ތައްޔާރުވަމުން ދާތީ، އެ މުނާސަބަތުގައި ވޯލްޑް ކަޕް އެ ގައުމުގައި ބޭއްވުމެވެ.

ނަމަވެސް، އުރުގުއޭގައި ވޯލްޑް ކަޕް ބޭއްވުމަކީ ޔޫރަޕްގެ ގައުމުތަކަށް އެހާ ހިތްހަމަޖޭ ކަމަކަށް ނުވި އެވެ. އެންމެ ބޮޑު ސަބަބަކީ އެޓްލާންޓިކް ކަނޑު ހުރަސްކޮށްފައި ކުރަންޖެހޭ ދިގު އަދި ބުރަ ދަތުރެވެ. ބައެއް ގައުމުތަކުން ޓީމުތައް ފޮނުވާކަށް ބޭނުމެއް ނުވި އެވެ. މުބާރާތް ފެށެން ދެ މަހަށް ވީއިރު ވެސް ޓީމުތައް ފޮނުވާނެ ކަމުގެ ޔަގީންކަމެއް ޔޫރަޕުން ނުދެ އެވެ.

މިކަމުގެ ސަބަބުން އޭރުގެ ފުޓްބޯޅައިގެ ބޮޑެތި ބާރުތައް ކަމަށްވާ ޖަރުމަން، އިޓަލީ، ސްޕެއިން އަދި ނެދަލޭންޑްސް ފަދަ ގައުމުތަކުން މުބާރާތުގައި ބައިވެރިނުވެ، ނުސީދާ "ބޮއިކޮޓެއް" ކުރި އެވެ. ފީފާގެ އޭރުގެ ރައީސް ޖޫލްސް ރިމޭ އިސްނަންގަވައިގެން ކުރެއްވި ބުރަ މަސައްކަތުން، ބެލްޖިއަމް، ފްރާންސް، ޔޫގޮސްލޭވިއާ އަދި ރޮމޭނިއާ ކަނޑުމަގުން ދަތުރު ފެށީ ރިމޭގެ އާދޭހަށެވެ.

ޖުމްލަ 13 ޓީމާއެކު ކުރިއަށްދިޔަ މި މުބާރާތުގެ ފައިނަލުގައި އުރުގުއޭއިން އާޖެންޓީނާގެ މައްޗަށް ކުރި ހޯދީ 4-2 އިންނެވެ. މި މެޗުގެ ކުރިން ބޭނުންކުރާނެ ބޯޅައަކާ މެދު އުފެދުނު ހިލާފާ ގުޅިގެން ނިންމީ ދެ ގައުމުގެ ބޯޅަ ވެސް ބޭނުންކުރުމަށެވެ. އެގޮތުން މެޗުގެ ފުރަތަމަ ހާފު ކުޅުނީ އާޖެންޓީނާގެ ބޯޅައިންނެވެ. އެ ހާފު ނިމުނުއިރު 2-1 އިން އާޖެންޓީނާ އޮތީ ކުރީގަ އެވެ. ނަމަވެސް އުރުގުއޭގެ ބޯޅައިން ކުޅުނު ދެ ވަނަ ހާފުގައި، އެ ގައުމުން ވަނީ ތިން ގޯލު ޖަހައި މެޗުގެ ނަތީޖާ އަނބުރާލާފަ އެވެ.