އުމުރުން އެންމެ 18 އަހަރެވެ. ނަމަވެސް އޭނާ އަކީ ބާސެލޯނާ އާއި ސްޕެއިން އަށް ވެސް އޭގެ ދެ ވަނައެއް ނެތް ފަދަ މުހިއްމު ކުޅުންތެރިއެކެވެ. އުމުރުން ހަގަސް ތަޖުރިބާކާރު ޑިފެންސްތައް ރޫޅާލުމަކީ ޔަމާލަށް އުނދަގޫ ކަމެއް ނޫނެވެ. އުމުރާ ބަލާފައި އޭނާ އަކީ ހާސްކަމެއް ނެތި ވަރަށް ހަމަޖެހިގެން ދަނޑުމަތީގައި ކުޅޭ ކުޅުންތެރިއެކެވެ.

ސްޕެއިންގެ ރަން ޖީލަކަށް ފަހު އަލުން އެފަދަ ކާމިޔާބީތަކަކާ ދިމާއަށް މިސްރާބު ޖަހާފައިވާ މި ދަނޑިވަޅުގައި ޔަމާލަކީ މިހާރު ވެސް ގައުމީ ޓީމުގެ އެޓޭކުގައި އެންމެ މުހިއްމު އެކަކެވެ. މިހާތަނަށް އޭނާ ވަނީ ގައުމީ ޓީމަށް 25 މެޗު ކުޅޭދީ ހަ ގޯލު ޖަހައިފަ އެވެ.

ޔަމާލް އަކީ ސްޕެއިން ގައުމީ ޓީމަށް މިހާތަނަށް ގޯލު ޖަހާފައިވާ އެންމެ ޒުވާން ކުޅުންތެރިޔާ އެވެ. އޭނާ ވަނީ އުމުރުން 16 އަހަރުގައި، 2024 ގެ ޔޫރޯ މުބާރާތް ކުޅެފަ އެވެ. އެ މުބާރާތުގައި މުހިއްމު ގޯލުތަކެއް ޖަހައި، މުހިއްމު އެސިސްޓްތަކެއް ކޮށް އޭނާ ވަނީ ގިން ރެކޯޑްތަކެއް މުގުރާލައިފަ އެވެ. ސްޕެއިނުން ޔޫރޯ މުބާރާތް ކާމިޔާބު ކުރި އިރު ޔަމާލް ވަނީ މުބާރާތުގެ އެންމެ މޮޅު ޒުވާން ކުޅުންތެރިޔާގެ އެވޯޑް ހާސިލް ކޮށްފަ އެވެ.

ޔޫރޯ މުބާރާތް ކުޅުނު ދުވަސްވަރު އޭނާ އަކީ އޯ ލެވެލް އިމްތިހާނު ހަދަމުން ދިޔަ ޒުވާނެކެވެ. މިހާރު އޭނާ މުޅިން ހުސްވެ ހުރީ ފުޓްބޯޅައަށެވެ. ވޯލްޑް ކަޕް ކޮލިފައިންގައި ވެސް ޔަމާލް ވަނީ ސްޕެއިނަށް އެންމެ މުހިއްމު ދަނޑިވަޅުތަކުގައި ތަފާތު ދައްކައިފަ އެވެ.

މިދިޔަ އަހަރުގެ ބެލޮންޑިއޯ ލިސްޓުގެ ދެ ވަނަ ހޯދީ ވެސް ޔަމާލެވެ. ބެލޮންޑިއޯ ނުލިބުނު ނަމަވެސް އެވޯޑް ހަފްލާގައި އެންމެ މޮޅު 21 އަހަރުން ދަށުގެ ކުޅުންތެރިޔާއަށް ދޭ އެވޯޑް ފާއިތުވި ދެ އަހަރު ވެސް ހޯދީ އޭނާ އެވެ.

މިދިޔަ އޭޕްރިލް މަހު ފަޔަށް ލިބުނު އަނިޔާއަކާ ގުޅިގެން ވޯލްޑް ކަޕުގައި ސްޕެއިންގެ ފުރަތަމަ މެޗުގައި ޔަމާލަށް ކުޅެވިދާނެ ކަމާމެދު ވަނީ ސުވާލު އުފެދިފަ އެވެ. އަނިޔާވި އިރު އޭނާ ވަނީ ބާސެލޯނާ އާއެކު 27 ގޯލުގައި ހިއްސާ ވެފަ އެވެ. ވޯލްޑް ކަޕަށް އޭނާ ފިޓް ވެއްޖެ ނަމަ ސްޕެއިންގެ އެންމެ ނުރައްކާތެރި ހަތިޔާރަކަށް ވާނީ ގައިމު ވެސް ޔަމާލްގެ ވާތު ފައި ކަމަށް ގިނަ ބަޔަކު ގަބޫލު ކުރެ އެވެ.

ސްޕެއިން އަކީ ޖެހިޖެހިގެން ބޮޑު ތިން މުބާރާތުގެ ޗެމްޕިއަންކަން ހޯދި ހަމައެކަނި ގައުމެވެ. އެގައުމުން އެ ކާމިޔާބީ އަށް ދިޔައީ 2008 ގެ ޔޫރޯ އާއި 2010 ގެ ވޯލްޑް ކަޕް އަދި 2012 ގެ ޔޫރޯ ކާމިޔާބުކޮށްގެންނެވެ. އޭރު ސްޕެއިންގައި އޮތް ޖީލަކީ ދުނިޔޭގެ ފުޓްބޯޅަ ދުށް އެންމެ މޮޅު ޓީމު ކަމަށް ގިނަ ބަޔަކު އެއްބަސްވެ އެވެ. މި ކާމިޔާބީތަކުގެ އިތުރުން ސްޕެއިނުން ވަނީ 2024 ވަނަ އަހަރުގެ ޔޫރޯ ވެސް ކާމިޔާބުކޮށްފަ އެވެ. އެ މުބާރާތް ކާމިޔާބުކުރީ ކުޅުނު ހަތް މެޗުން ވެސް މޮޅުވެގެންނެވެ.

ވޯލްޑް ކަޕްގައި ސްޕެއިން ވާދަކުރާ މިއީ 17 ވަނަ ފަހަރެވެ. މިދިޔަ މާޒީގައި އެޓީމަށް ފާޑުކިޔުން އަމާޒުވީ ވަރުގަދަ ލީގެއް އޮވެމެ ދުނިޔޭގެ ޗެމްޕިއަންކަން ނުލިބުމެވެ. އެކަމަށް އެގައުމުން ނިމުން ގެނައީ 2010 ގެ ވޯލްޑް ކަޕް ކާމިޔާބުކޮށްގެންނެވެ.

އެންމެ ފަހުގެ ދެ މުބާރާތުގައި ވެސް ސްޕެއިން ވޯލްޑް ކަޕުން ކެޓީ ގަދަ 16 ގެ ބުރުގައި ޕެނަލްޓީން ބަލިވެގެންނެވެ.

މިފަހަރުގެ ވޯލްޑް ކަޕާ ކުރިމަތިލާއިރު ސްޕެއިން އަކީ ވޯލްޑް ކަޕްގެ އެއް ފޭވަރިޓުންނެވެ. އަނެއްކޮޅުން 2030 އަކީ ޕޯޗުގަލް އާއި މޮރޮކޯއާ އެކު ސްޕެއިނުން ވޯލްޑް ކަޕް ކޯ-ހޯސްޓްކުރާ އަހަރެވެ.

ސްޕެއިން ވޯލްޑް ކަޕަށް ކޮލިފައިވީ ވެސް ފަސޭހަކަމާ އެކު ގްރޫޕުގެ އެއް ވަނަ ހޯދައިގެންނެވެ. ކޮލިފައިންގެ ހަ މެޗުގެ ތެރެއިން ފަސް މެޗުން އެޓީމު މޮޅުވި އެވެ. އެއްވަރުވީ އެންމެ މެޗަކުންނެވެ. ކޮލިފައިންގައި އެޓީމު ކޮޅަށް ގޯލެއް ވެސް ވަނީ ފަހު މެޗުގައި އެކަންޏެވެ. ތުރުކީއާ ވާދަކުރި އެ މެޗު ނިމުނީ 2-2 އިން އެއްވަރުވެގެންނެވެ.

ކޯޗު: ލުއިސް ޑެ ލަ ފުއެންޓޭ  

ސްޕެއިންގެ ކޯޗު ލުއިސް ޑެ ލަ ފުއެންޓޭ އަކީ 2013 އިން ފެށިގެން ސްޕެއިންގެ ފުޓްބޯޅައިގައި ހަރަކާތްތެރިވާ ކޯޗެވެ. އެގޮތުން އޭނާ ވަނީ ސްޕެއިންގެ 19 އަހަރުން ދަށާއި 21 އަހަރުން ދަށް އަދި 23 އަހަރުން ދަށުގެ ޓީމަށް އިރުޝާދުދީފަ އެވެ. ސްޕެއިންގެ ސީނިއާ ޓީމާ ޑެ ލަ ފުއެންޓޭ ހަވާލުވީ 2022 ވަނަ އަހަރު އެވެ. އޭނާގެ ކޯޗުކަމުގައި ސްޕެއިނުން ޔޫރޯ ކާމިޔާބުކުރީ ތަފާތު މޮޅު ކުޅުމެއް ދައްކައިގެންނެވެ. ޒުވާން ޓީމުތަކުގައި ޑެ ލަ ފުއެންޓޭ ތަމްރީނުކުރި ބައެއް ކުޅުންތެރިން މިހާރު ތިބީ ސީނިއާ ޓީމުގަ އެވެ. ކުޅުންތެރިން ދަސްވުމާއި، ކޯޗިންގެ ތަޖުރިބާއާއި ސްޕެއިންގައި އޮތް ހުނަރާ އެކު ޑެ ލަ ފުއެންޓޭއާ އެކު ސްޕެއިން މި ވޯލްޑް ކަޕްގައި ވެސް ކާމިޔާބީއާ ހަމައަށް ދިއުމަކީ ވެދާނެ ކަމެއް ކަމަށް ގިނަ ބަޔަކު ގަބޫލުކުރެ އެވެ.

މުހިއްމު ކުޅުންތެރިން 

ކޮލިފައިންގައި ސްޕެއިނަށް އެންމެ ގިނަ ގޯލު ކާމިޔާބުކޮށްދިނީ ހަ ގޯލާ އެކު މިކެލް އޮޔާޒަބަލް އަދި މިކެލް މެރީނޯ އެވެ. މި ކުޅުންތެރިންނާ އެކު ކޮންމެ މަގާމެއްގައި ވެސް ތިބީ ތަރިންނެވެ. ސްޕެއިން ޓީމުގެ އެންމެ ވިދުންގަދަ ތަރިއަކީ ޒުވާން ލަމީން ޔަމާލް އެވެ. ފުރަތަމަ ފަހަރަށް ވޯލްޑް ކަޕްގައި ވާދަކުރަން ތައްޔާރުވާއިރު ޔަމާލް ވަނީ ޔޫރޯގައި ވެސް ތަފާތު މޮޅު ކުޅުމެއް ދައްކައިފަ އެވެ. އިތުރު ކުޅުންތެރިންނަށް ބަލާއިރު ދެ މިޑްފީލްޑަރުން ކަމަށްވާ ރޮޑްރީ އާއި ޕެޑްރީ ފާހަގަކޮށްލެވެ އެވެ. މި ކުޅުންތެރިން ވަށައިގެން ސްޕެއިން ސްކޮޑުގައި ހިމެނޭ ކޮންމެ ކުޅުންތެރިޔަކީ އިދިކޮޅު ޓީމަށް ނުރައްކާ ކުރެވޭ ފެންވަރުގެ ކުޅުންތެރިންނެވެ.

މި މުބާރާތުގެ އެންމެ ފާހަގަކޮށްލެވޭ އަދި އެންމެ ހިތްދަތި ހާދިސާއަކީ ކުއާޓާ ފައިނަލުގައި އުރުގުއާއީ އާއި ގާނާ ބައްދަލުކުރި މެޗެވެ. މެޗުގެ ފަހު ސިކުންތުކޮޅުގައި ގާނާއިން ޖަހަން އުޅުނު ސައްހަ ގޯލެއް، އުރުގުއާއީގެ ލުއިސް ސުއަރޭޒް ގަސްދުގައި އަތުން މަނާކުރުމުން އޭނާއަށް ރަތް ކާޑު ދައްކައި ގާނާއަށް ޕެނަލްޓީއެއް ދިނެވެ. ނަމަވެސް ގާނާގެ އަސަމޯއާ ގިއާން ޖެހި ޕެނަލްޓީ ގޯލުގެ ހުރަސް ދަނޑީގައި ޖެހި ބޭރުވުމާއެކު، ސެމީ ފައިނަލަށް ދަތުރުކުރާނެ ފުރަތަމަ އެފްރިކާ ގައުމަށް ވުމަށް ގާނާއިން ކުރި އުންމީދު ފެނަށްވެ، މުޅި އެފްރިކާ ބައްރު ކަރުނައިން ތެންމާލި އެވެ.

ފައިނަލް މެޗަކީ ފުޓްބޯޅައިގެ ރީތި ކުޅުމަށްވުރެ ބޮޑަށް، ނެދަލޭންޑްސްގެ ފަރާތުން ފެނުނު "ހަރުކަށި" ކުޅުމުގެ ސަބަބުން މަޝްހޫރުވި މެޗެކެވެ. މުޅި މެޗުގައި ރެފްރީ ހަވާޑް ވެބް އަށް 14 ރީނދޫ ކާޑާއި ރަތް ކާޑެއް ދައްކަން ޖެހުނުއިރު، ނެދަލޭންޑްސްގެ ނައިޖެލް ޑި ޔޮންގް، ސްޕެއިންގެ ޒަބީ އޮލޮންސޯގެ މޭމަތީގައި ޖެހި "ކަރާޓޭ ކިކް" އަކީ ފުޓްބޯޅައިގެ އުސޫލުތަކާ މުޅިން ހިލާފު، ބިރުވެރި މަންޒަރެކެވެ. ނަމަވެސް މެޗުގެ 116 ވަނަ މިނިޓުގައި އެންޑްރޭ އިނިއެސްޓާ ޖެހި ލަނޑާއެކު ސްޕެއިން ވަނީ ފުރަތަމަ ފަހަރަށް ތަށި އުފުލާލައި، ޔޫރަޕުން ބޭރުގައި ބޭއްވި މުބާރާތެއް ކާމިޔާބުކުރި ފުރަތަމަ ޔޫރަޕް ގައުމުގެ ޝަރަފް ހޯދައިފަ އެވެ.

މި މުބާރާތުގައި މުޅި ދުނިޔޭގެ ސަމާލުކަން ހޯދި އަނެއް ތަރިއަކީ މެޗުތަކުގެ ނަތީޖާ ދުރާލާ ބުނެދިން އޮކްޓޮޕަސް "ޕޯލް" އެވެ. ޖަރުމަނުގެ އެކުއޭރިއަމެއްގައި އޮތް މި ބޯވަ، ސްޕެއިން ޗެމްޕިއަން ހޯދާނެ ކަމަށް ބުނި ބުނުމާއެކު، އޭނާ ބުނި ހުރިހާ މެޗެއްގެ ނަތީޖާ ދިމާވުމަކީ އެ ދުވަސްވަރުގެ އެންމެ މަޝްހޫރު ހަބަރެވެ. މީގެ އިތުރުން، އުރުގުއާއީގެ ޑިއޭގޯ ފޯލާން ދެއްކި ތަފާތު މޮޅު ކުޅުމުން މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދިއިރު، ޖަރުމަނުގެ ޒުވާން ތަރި ތޯމަސް މުލާ ވެގެންދިޔައީ މުޅި ދުނިޔެ ސިއްސުވާލި އައު ހޯދުމަކަށެވެ. 2010 ގެ ވޯލްޑް ކަޕަކީ އެފްރިކާގެ މެހެމާންދާރީއާއި، ސްޕެއިންގެ ފުޓްބޯޅަ ފަލްސަފާ "ޓިކީ-ޓާކާ" މުޅި ދުނިޔެއަށް ގަދަވީ މުބާރާތެވެ.