އާޖެންޓީނާ އަކީ ދެކުނު އެމެރިކާ ސަރަހައްދުން، މުޅި ދުނިޔޭގެ ނިސްބަތުން ވެސް ވެސް ހުނަރުވެރި މިޑްފީލްޑަރުން އުފައްދައިދޭ ގައުމެކެވެ. އާޖެންޓީނާ އަށް 1998 ގެ ވޯލްޑް ކަޕުގައި ކުޅުނު ކުރީގެ ޑިފެންޑަރު ޕަބްލޯ ޕާޒް ގެ ދަރިފުޅު، ނިކޯ ޕާޒް އުފަންވީ، ސްޕެއިން އަށެވެ. ރެއާލް މެޑްރިޑްގެ އެކަޑަމީން ތަމްރީނުވެ އޭނާ ވެފައި ވަނީ ޔޫރަޕް ސްޓައިލުގެ އާޖެންޓީނާ މިޑްފީލްޑަރަކަށެވެ.

ރެއާލުން ވަނީ ބައި-ބެކް ކްލޯސް އާއެކު ޕާޒް، އިޓަލީ ލީގުގެ ކޯމޯއަށް ދޫކޮށްލައިފަ އެވެ. ފާއިތުވި ދެ ސީޒަންގައި ވެސް އޭނާ ވެފައި ވަނީ އަލަށް ޕްރޮމޯޓްވި ސެސް ފެބްރިގާސްގެ ކޯމޯގެ މުހިއްމު ކުޅުންތެރިޔަކަށެވެ. އޭނާ ވަނީ އަންނަ ސީޒަނަށް ކޯމޯ އިން ޔޫރަޕްގެ ފުތްބޯޅަ ކަށަވަރު ކުރުމުގައި މުހިއްމު ދައުރެއް އަދާ ކޮށްފަ އެވެ.

މިއާ އެކު ރެއާލް މެޑްރިޑުން އަންނަނީ އޭނާގެ ބައި ބެކް ކްލޯސްގެ ބޭނުން ހިފައި ނުވަ މިލިއަން ޑޮލަރަށް އޭނާ އަލުން ޓީމަށް ގެނައުމުގެ މަސައްކަތް ކުރަމުންނެވެ. އޭނާ ކޯމޯއަށް ގެންދިޔައީ ހަ މިނިއަން ޑޮލަރުގެ ޑީލެއްގެ ދަށުންނެވެ.

ގައުމީ ޓީމަށް މިހާތަނަށް މިހާތަނަށް 8  މެޗު ކުޅެދީފައިވާ އެޓޭކިން މިޑްފީލްޑަރު މި އަހަރު ވަނީ ފުރަތަމަ ގޯލު ވެސް ޖަހައިދީފަ އެވެ.

އެންމެ ފަހުގެ ވޯލްޑް ކަޕް އާޖެންޓީނާއާ އެކު ކާމިޔާބުކޮށް، މުބާރާތުގެ މޮޅު ކުޅުންތެރިޔާގެ މަގާމް ހޯދުމުން ލިއޮނަލް މެސީގެ ކެރިއަރު ފުރިހަމަވީ ގިނަ ބަޔަކު ގަބޫލުކުރެ އެވެ. އެކަމަކު އަދިވެސް އޭނާ ހުރީ ކެރިއަރު ކުރިއަށް ގެންދާ ގޮތަށެވެ. އެގޮތުން އުމުރުން 38 އަހަރުގެ މެސީގެ ނުފޫޒު މި ވަނީ ބާސެލޯނާ އާއި ޕީއެސްޖީ އަށް ފަހު ޔޫރަޕުން ބޭރަށް، އެމެރިކާ އަށް ފޯރައިފަ އެވެ. އޭނާ މިހާރު ކުޅެމުން އަންނަނީ އެމެރިކާގެ މޭޖާ ލީގުގެ އިންޓަ މަޔާމީއަށެވެ. ކުރިޔެކޭ އެއްގޮތަށް އަދިވެސް އޭނާ އަންނަނީ ރެކޯޑްތައް ހަދަމުންނެވެ. އެހެންވެ މި އަހަރުގެ ވޯލްޑް ކަޕުގައި ވެސް އޭނާގެ ޖާދޫ ފެންނާނެ ކަމަށް ބެލެވެ އެވެ. މިހާތަނަށް ރެކޯޑް ފަސް ވޯލްޑް ކަޕުގައި ކުޅެފައިވާ މެސީ އަކީ އަދިވެސް އާޖެންޓީނާ ޓީމުގެ މުހިއްމު ކުޅުންތެރިޔެކެވެ.

ވޯލްޑް ކަޕުގެ އެންމެ ފަހުގެ ޗެމްޕިއަން އާޖެންޓީނާ އަކީ މުބާރާތުގެ ތާރީހުގައި އެންމެ ކާމިޔާބު އެއް ގައުމެވެ. އާޖެންޓީނާ އިން ވަނީ 1978، 1986 އަދި 2022 ވަނަ އަހަރުގެ ވޯލްޑް ކަޕް ކާމިޔާބުކޮށްފަ އެވެ. ތިން ފަހަރު މުބާރާތުގެ ދެ ވަނަ މަގާމް ހޯދި އެވެ. އެއީ ވޯލްޑް ކަޕްގެ ފުރަތަމަ މުބާރާތް ބޭއްވި 1930 އާއި 1990 އަދި 2014 ވަނަ އަހަރު އެވެ.

އާޖެންޓީނާ އިން ފުރަތަމަ ފަހަރަށް ވޯލްޑް ކަޕް ކާމިޔާބުކުރީ 1978 ވަނަ އަހަރު ނެދަލެންޑްސް 1-3 އިން ބަލިކޮށްގެންނެވެ. ދެ ވަނަ ފަހަރަށް ދުނިޔޭގެ ޗެމްޕިއަންކަން ހޯދީ 1986 ވަނަ އަހަރު ޖަރުމަނުގެ މައްޗަށް 2-3 އިން ކުރި ހޯދައިގެންނެވެ. އެ ފައިނަލުގައި ޖާދޫ ދެއްކީ ޑިއޭގޯ މަރަޑޯނާ އެވެ. އާޖެންޓީނާ 36 އަހަރުގެ އިންތިޒާރަކަށް ފަހު ގަތަރުގައި އޮތް ވޯލްޑް ކަޕް ކާމިޔާބުކުރީ ފްރާންސާ ވާދަކުރި ފޯރިގަދަ ފައިނަލް މެޗުގައި ޕެނަލްޓީން ކުރި ހޯދައިގެންނެވެ. އާޖެންޓީނާގެ ތިން ވަނަ ވޯލްޑް ކަޕް ހާއްސަވީ މުބާރާތުގެ މޮޅު ކުޅުންތެރިޔާގެ މަގާމް ހޯދި ލިއޮނަލް މެސީ އަށެވެ.

މިފަހަރުގެ ވޯލްޑް ކަޕުން އާޖެންޓީނާ ޖާގަ ހޯދީ ދެކުނު އެމެރިކާގެ ކޮލިފައިންގެ އެއް ވަނަ ހޯދައިގެންނެވެ. އެޓީމުން އެއް ވަނަ ކަށަވަރުކުރީ 18 މެޗުން 38 ޕޮއިންޓް ހޯދައިގެންނެވެ. ކޮލިފައިންގެ 12 މެޗުން މޮޅުވެ ދެ މެޗު އެއްވަރުވިއިރު ބަލިވީ ހަތަރު މެޗުންނެވެ. ޖުމްލަ 31 ގޯލު ޖެހިއިރު ބައިކޮޅަށް 10 ގޯލު ވަނެވެ.

އުތުރު އެމެރިކާގައި ބާއްވާ ވޯލްޑް ކަޕަށް ނުކުންނައިރު، އާޖެންޓީނާ އަކީ މިއަހަރުގެ މުބާރާތުގެ ވެސް އެއް ފޭވަރިޓެވެ.

ކޯޗު: ލިއޮނެލް ސްކަލޯނީ (48 އަހަރު)

އާޖެންޓީނާގެ ކޯޗަކީ އެގައުމަށް 2022 ވަނަ އަހަރުގެ ވޯލްޑް ކަޕް ކާމިޔާބުކޮށްދިން ލިއޮނެލް ސްކަލޯނީ އެވެ. ކޯޗިންގައި ސްކަލޯނީގެ ހަމައެކަނި ތަޖުރިބާއަކީ އާޖެންޓީނާ އެވެ. ގައުމީ ޓީމުގެ ކޯޗުކަމާ 2018 ވަނަ އަހަރު ސްކަލޯނީ އެންމެ ފުރަތަމަ ހަވާލުވީ ވަގުތީގޮތުންނެވެ. އެކަމަކު ލިބުނު ފުރުސަތުގައި ދާއިމީކޮށް ހަވާލުވެ އޭނާ ވަނީ ގައުމީ ޓީމަށް ގިނަ ކާމިޔާބީތަކެއް ހޯދައިދީފަ އެވެ. ވޯލްޑް ކަޕުގެ އިތުރުން 2021 އަދި 2024 ވަނަ އަހަރުގެ ކޮޕާ އެމެރިކާ އާޖެންޓީނާ އަށް ހޯދައިދިނެވެ. އަދި 2022 ވަނަ އަހަރު ޔޫރަޕްގެ ޗެމްޕިއަން އިޓަލީއާ ދެކޮޅަށް ކުޅުނު ފައިނަލަސިމާގެ ޗެމްޕިއަންކަން ވެސް ހޯދި އެވެ. އާޖެންޓީނާ އާއި އިޓަލީގެ ރަށްވެހިކަން އޮން ސްކަލޯނީ މިފަހަރުގެ ވޯލްޑް ކަޕަށް ވެސް ނުކުންނަނީ އިތުބާރާ އެކު ދުނިޔޭގެ ޗެމްޕިއަންކަން ދިފާއުކުރުމަށެވެ.

މުހިއްމު ކުޅުންތެރިން

އާޖެންޓީނާގެ ތަރިއަކީ ދުނިޔޭގެ ތާރީހު ދުށް އެންމެ މޮޅު އެއް ފުޓްބޯޅަ ކުޅުންތެރިޔާ މެސީ އެވެ. ކޮލިފައިންގެ 8 ގޯލާ އެކު މެސީ ވަނީ ދެކުނު އެމެރިކާ ލަނޑު ޗާޓުގެ އެއް ވަނަ ހޯދައިފަ އެވެ. މެސީއާ އެކު މަޝްހޫރު ގިނަ ކުޅުންތެރިންތަކެއް އާޖެންޓީގައި ހިމެނެ އެވެ. އެޓޭކަށް ބަލާއިރު ހޫލިއަން އަލްވަރޭޒް އާއި ލަޓާރޯ މާޓިނޭޒް ފާހަގަކުރެވެ އެވެ. މިއިން ކޮންމެ ކުޅުންތެރިއަކު ވަނީ ކޮލިފައިންގައި ހަތަރު ގޯލު ޖަހައިފަ އެވެ. މެދުތެރޭގައި ހިމެނޭ ރޮޑްރީގޯ ޑި ޕޯލްގެ ނުފޫޒާއި އެންޒޯ ފެނާންޑޭޒް އަދި އަލެކްސިސް މެކަލިސްޓާގެ ކުޅުމަކީ އާޖެންޓީނާގެ އިތުބާރު ބޮޑުވާ ސަބަބެވެ. އަރަމުން އަންނަ ކުޅުންތެރިންގެ ތެރޭގައި، ކޮލިފައިންގައި ތިން ގޯލު ޖެހި އެތުލެޓިކޯ މެޑްރިޑްގެ ތިއާގޯ އަލްމާޑާ ފާހަގަކުރެވެ އެވެ. ޒުވާން ކުޅުންތެރިންގެ ލިސްޓުގައި އެންމެ ފާހަގަކޮށްލެވޭ ތަރިއަކީ ރެއާލް މެޑްރިޑަށް ކުޅޭ އުމުރުން 18 އަހަރުގެ ފްރެންކޯ މަސްޓަންޓޫނޯ އެވެ.

ގަތަރުގައި 2022 ވަނަ އަހަރު ބޭއްވި ވޯލްޑް ކަޕަކީ މުޅި ފުޓްބޯޅަ ތާރީހު ދުށް އެންމެ ތަފާތު އަދި އެންމެ ފޯރިގަދަ މުބާރާތެވެ. މިއީ އަރަބި އަދި އިސްލާމީ ގައުމެއްގައި ބޭއްވި ފުރަތަމަ ވޯލްޑް ކަޕަށް ވާއިރު، މުބާރާތުގެ ފެށުންވެސް ވެގެންދިޔައީ ބޮޑު ސިހުމަކަށެވެ. މުބާރާތުގެ ފުރަތަމަ މެޗުގައި ސައުދީ އަރަބިއްޔާއިން، އޭރު ބަލިނުވެ 36 މެޗު ފުރިހަމަކޮށްގެން އައި އާޖެންޓީނާ ބަލިކޮށް މުޅި ދުނިޔެ ހައިރާން ކޮށްލި އެވެ.

މި މުބާރާތުން ދުނިޔެ ހައިރާންކޮށްލީ އަރަބި ބައްރުގެ އެހެން ގައުމެއް ކަމަށްވާ މޮރޮކޯ އެވެ. އެ ޓީމުން ދެއްކި ހައިރާންކުރުވަނިވި ކުޅުމާ އެކު، އެ ގައުމު ވެގެންދިޔައީ ވޯލްޑް ކަޕްގެ ސެމީ ފައިނަލަށް ދަތުރުކުރި އެފްރިކާގެ ފުރަތަމަ ގައުމަށެވެ.

މި މުބާރާތުގެ ފައިނަލް މެޗަކީ ފުޓްބޯޅަ ދުނިޔެ މިހާތަނަށް ދުށް އެންމެ ފޯރިގަދަ "ކްލެސިކް" މެޗެވެ. އާޖެންޓީނާ އާއި ފްރާންސް ބައްދަލުކުރި މި މެޗު، އިތުރު ވަގުތު ކުޅެ ނިމުނުއިރު 3-3 އިން އެއްވަރުވެފައި އޮތުމުން، ނަތީޖާ ނެރުނީ ޕެނަލްޓީ ޖަހައިގެންނެވެ. ފްރާންސްގެ ކީލިއަން އެމްބާޕޭ ފައިނަލްގައި "ހެޓްރިކް" އެއް ހެދި ނަމަވެސް، އާޖެންޓީނާއިން ވަނީ ހިތްވަރާއެކު މެޗު ކާމިޔާބުކޮށް، ތިންވަނަ ފަހަރަށް ދުނިޔޭގެ ތަށި އުފުލާލައިފަ އެވެ. މިއީ 36 އަހަރުގެ ދިގު އިންތިޒާރަކަށްފަހު އާޖެންޓީނާއިން ހޯދި ތާރީހީ ކާމިޔާބެކެވެ.

މުޅި ދުނިޔޭގެ ސަމާލުކަން މި މުބާރާތަށް ހުއްޓުނު އެންމެ ބޮޑު ސަބަބަކީ ލިއޮނަލް މެސީ އެވެ. އޭނާގެ ފަހު ވޯލްޑް ކަޕްގައި، މުޅި މުބާރާތުގެ މޮޅު ކުޅުންތެރިޔާގެ މަގާމު ހޯދައި، އެންމެ ފަހުން ދުނިޔޭގެ ތަށީގައި ބޮސްދިނުމަކީ އޭނާގެ ފުޓްބޯޅަ ކެރިއަރުގައި ޖެހުނު އެންމެ ފުރިހަމަ ސިއްކަ އެވެ. މި މުބާރާތުގެ ރަން ބޫޓު 8 ގޯލާއެކު އެމްބާޕޭ ހޯދިއިރު، މެސީ ވަނީ ދެ ވަނަ ފަހަރަށް "ގޯލްޑަން ބޯލް" ހޯދި ފުރަތަމަ ކުޅުންތެރިޔާގެ ރެކޯޑް ހަދައިފަ އެވެ. ގަތަރުގެ ލުސައިލް ސްޓޭޑިއަމްގައި މެސީ އަރަބި ސަގާފީ ހެދުމެއް ކަމަށްވާ ބިޝްތު ލައިގެން ތަށި އުފުލާލި މަންޒަރަކީ ވޯލްޑް ކަޕްގެ ތާރީހުގައި އަބަދަށް ފެންނަން ހުންނާނެ ފޮޓޯއެކެވެ.

މި މުބާރާތުގެ ފުރިހަމަކަން އިތުރުކޮށްދިން އަނެއް ސަބަބަކީ، ވޯލްޑް ކަޕެއް ބޭއްވުމަށްޓަކައި ގައުމަކުން މިހާތަނަށް ކުރި އެންމެ ބޮޑު އިންވެސްޓްމަންޓް ގަތަރުން ކުރުމެވެ. ގާތްގަނޑަކަށް 220 ބިލިއަން ޑޮލަރަށްވުރެ ގިނަ ފައިސާ ހަރަދުކޮށްގެން، ޒަމާނީ ފެންވަރުގެ އަށް ސްޓޭޑިއަމާއި، އާ މެޓްރޯ ނިޒާމެއްގެ އިތުރުން މުޅިން އާ ސިޓީތަކެއް ބިނާކޮށް، ގަތަރުން ވަނީ ދުނިޔެ ހައިރާންކޮށްލައިފަ އެވެ.

ކޮލަމްބިއާގައި 1986 ގެ ވޯލްޑް ކަޕް ބާއްވަން ފީފާގެ ބައްދަލުވުމުން ނިންމީ 1974 ގަ އެވެ. އެކަމަކު ވޯލްޑް ކަޕް ބާއްވަން ހަތަރު އަހަރަށް ވެފައި ވަނިކޮށް އެ ގައުމުން އެ ފުރުސަތު ދޫކޮށްލީ އިގްތިސޯދީ ގޮތުން އޭރު ކުރިމަތި ވެފައި އޮތް ދަތި ހާލަތުގެ ސަބަބުންނެވެ. ކޮލަމްބިއާއިން ފުރުސަތު ދޫކޮށްލުމުން ތިން ގައުމަކުން ޝައުގުވެރިކަން ފާޅު ކުރި އެވެ. މެކްސިކޯ، ކެނަޑާ އަދި އެމެރިކާ އެވެ. ފީފާގެ ބައްދަލުވުމުގައި ބައިވެރިވި ހުރިހާ މެންބަރުންގެ އިއްތިފާގުން ނިންމީ މެކްސިކޯ އަށް ވޯލްޑް ކަޕް ބޭއްވުމުގެ ފުރުސަތު ދިނުމަށެވެ.

ވޯލްޑް ކަޕް ބާއްވަން މެކްސިކޯ ތައްޔާރުވަމުން ދަނިކޮށް، މުޅި ގައުމު ސިއްސުވާލި އެ ގައުމަށް އައި ބާރުގަދަ ބިރުވެރި ބިންހެލުމަކުންނެވެ. މުބާރާތް ފެށެން އެންމެ 8 މަސް ދުވަހަށް ވެފައި ވަނިކޮށް އައި ބިންހެލުމާ އެކު މެކްސިކޯއަށް މުބާރާތް ބޭއްވިދާނެތޯ ދުނިޔޭގެ އެކި ގައުމުތަކުން ސުވާލު އުފެއްދި އެވެ. ނަމަވެސް، މެކްސިކޯގެ ސްޓޭޑިއަމްތަކަށް ބޮޑު ގެއްލުމެއް ލިބިފައި ނުވުމާއި، އެ ގައުމުގެ ސަރުކާރުން މުބާރާތް ބާއްވަން ބޭނުންވުމުން ފީފާ އިން ނިންމީ ކުރިއަށް ދާށެވެ.

މެކްސިކޯގައި ބޭއްވި ވޯލްޑް ކަޕަކީ ހަމައެކަނި ފުޓްބޯޅަ މުބާރާތެއް ނޫނެވެ. މިއީ ސިޔާސީ ގޮތުންނާއި ނަފްސާނީ ގޮތުން މުޅި ދުނިޔެ ބަލަން އޮތް ބޮޑު "ހަނގުރާމައެކެވެ." އާޖެންޓީނާ އާއި އިންގްލެންޑް ކުއާޓާ ފައިނަލްގައި ބައްދަލުކުރިއިރު، ދެ ގައުމުގެ މެދުގައި ކުރެވުނު ފޯކްލޭންޑް ހަނގުރާމައަށް އޮތީ އެންމެ ހަތަރު އަހަރެވެ. ދަނޑުމަތީގައި އާޖެންޓީނާގެ ކުޅުންތެރިން ނުކުތީ ހަމައެކަނި މޮޅުވާކަށް ނޫނެވެ. އެމީހުން ނުކުތީ ހަނގުރާމައިގައި ލިބުނު ނިކަމެތިކަމުގެ ބަދަލު ހިފާށެވެ.

މި މެޗު ވެގެންދިޔައީ ޑިއޭގޯ މެރަޑޯނާގެ "ޖާދޫ" މުޅި ދުނިޔެއަށް ދައްކާލި މެޗަށެވެ. މި މެޗުގައި މެރަޑޯނާ ޖެހި ދެ ލަނޑަކީ މިއަދާ ހަމައަށްވެސް ފުޓްބޯޅައިގެ އެންމެ މަޝްހޫރު ދެ ގޯލެވެ. ފުރަތަމަ ލަނޑަކީ އޭނާގެ އަތުން ޖެހި ލަނޑެކެވެ. ރެފްރީއަށް އެއީ ބޮލުން ޖެހި ލަނޑެއް ކަމަށް ހީވެ ގޯލު ބަލައިގަތުމުން މުޅި އިނގިރޭސި ވިލާތް ރުޅިން ކެކިގަތެވެ. މި ލަނޑުގެ ހޫނުގަނޑު ނުކެނޑި އުޅެނިކޮށް، އޭގެ ހަތަރު މިނެޓް ފަހުން އަމިއްލަ ހާފުން ފެށިގެން އިންގްލެންޑުގެ ފަސް ކުޅުންތެރިން ކައިރިން ނައްޓާލުމަށްފަހު އޭނާ ޖެހި ލަނޑަކީ "ގަރުނުގެ ލަނޑު" ގެ ގޮތުގައި ކަނޑައަޅާފައިވާ ހިތްގައިމު ލަނޑެވެ.

ފައިނަލުގައި ހުޅަނގު ޖަރުމަން 3-2 އިން ބަލިކޮށް އާޖެންޓީނާ ތަށި އުފުލާލިއިރު، މެރަޑޯނާ ވެގެންދިޔައީ އާޖެންޓީނާގެ ގައުމީ ބަތަލަކަށެވެ. މުބާރާތުގެ އެންމެ ގިނަ ގޯލު ޖެހި ކުޅުންތެރިޔާގެ މަގާމު 6 ގޯލާއެކު އިންގްލެންޑްގެ ގެރީ ލިނެކާ ހޯދި ނަމަވެސް، 1986 ވަނަ އަހަރުގެ ވޯލްޑް ކަޕް ތާރީހިގައި ލިޔެވިފައިވަނީ "މެރަޑޯނާގެ ވޯލްޑް ކަޕް" ގެ ގޮތުގަ އެވެ.

އާޖެންޓީނާގައި 1978 ގެ ވޯލްޑް ކަޕް ފައިނަލަށްފަހު ފެނިގެންދިޔައީ ކުޅިވަރުގެ މައިދާނުގައި ފެންނާނެ އެންމެ އާދަޔާ ހިލާފު އެއް މަންޒަރެވެ. މުބާރާތުގެ ރަނަރަފް ޓީމުގެ ގޮތުގައި ނެދަލެންޑްސް އޮތް ނަމަވެސް، އެ ގައުމުގެ ކުޅުންތެރިން ވަނީ ރަސްމީކޮށް މެޑަލް ބަލައިގަތުމަށް އިންކާރުކޮށް، އިނާމު ދިނުމުގެ ރަސްމިއްޔާތު ބޮއިކޮޓްކޮށްފަ އެވެ. މިއީ އާޖެންޓީނާގެ އޭރުގެ އަސްކަރީ ސަރުކާރުގެ ނުފޫޒުން މުޅި މުބާރާތް ކިލަނބުވެފައި އޮތް ކަމަށް ބުނެ، ނެދަލެންޑްސްއިން ދުނިޔެއަށް ދިން ވަރުގަދަ މެސެޖެކެވެ. މިއީ ވޯލްޑް ކަޕް ތާރީހުގައި ވެސް ފައިނަލަކަށްފަހު ރަނަރަފް ޓީމަކުން އިނާމު ދިނުމުގެ ރަސްމިއްޔާތުގައި ބައިވެރިނުވެ ދަނޑުން ފޭބި ހަމައެކަނި ފަހަރެވެ.

މި މުބާރާތުގެ އެންމެ "ޝައްކު ބޮޑު" ސިއްރަކީ ދެވަނަ ބުރުގައި އާޖެންޓީނާ އާއި ޕެރޫ ބައްދަލުކުރި މެޗެވެ. ފައިނަލަށް ދިއުމަށްޓަކައި ބްރެޒިލް ފަހަތަށް ޖައްސާލުމަށް އާޖެންޓީނާއަށް މަދުވެގެން ހަތަރު ލަނޑުގެ ތަފާތުން މޮޅުވާން މަޖުބޫރުވެފައި އޮއްވައި، އެ މެޗު ހައިރާންކުރުވަނިވި ގޮތަކަށް 6-0 އިން އާޖެންޓީނާ ކާމިޔާބުކުރުމުން ގިނަ ބައެއްގެ ލޯތައް އަމާޒުވި އެވެ. މި މެޗުގެ ނަތީޖާއާ މެދު ސުވާލު އުފެދުނު އަނެއް ސަބަބަކީ، ޕެރޫގެ ގޯލު ބަލަހައްޓަން ހުރި ކީޕަރު ރާމޮން ކުއިރޯގާ އަކީ އާޖެންޓީނާއަށް އުފަން، އެ ގައުމަށް ނިސްބަތްވާ މީހަކަށް ވުމެވެ. ބައެއް ރިޕޯޓްތައް ބުނާގޮތުގައި، ޕެރޫގެ ކުޅުންތެރިންނަށް ބިރުދައްކައި، މެޗުގެ ނަތީޖާ ބަދަލުކުރުމަށް އާޖެންޓީނާގެ އަސްކަރީ ސަރުކާރުން ވަނީ ސީދާ ނުފޫޒު ފޯރުވާފަ އެވެ.

ފައިނަލް މެޗު ފެށުނީވެސް އާޖެންޓީނާގެ ސަޕޯޓަރުން ދަނޑުތެރެއަށް އުކި ކުދިކުދި ހުދު ކަރުދާސްތަކުން ނުވަތަ "ޓިކް-ޓޭޕް" ތަކުން މުޅި ދަނޑު ހުދު ސާލެއް ފަދައިން ފޮރުވާލާފައި އޮތް އައިކޮނިކް މަންޒަރާއެކު އެވެ. ނަމަވެސް، މެޗު ފެށުން ލަސްކުރުމާއި، ނެދަލެންޑްސްގެ ކުޅުންތެރިން ނަފްސާނީ ގޮތުން ބަލިކޮށްލަން ކުރި ކަންތައްތަކުގެ ސަބަބުން ދަނޑުމަތީގައި އޮތީ ބޮޑު ނުތަނަވަސްކަމެކެވެ. އިތުރު ވަގުތު ކުޅެގެން 3-1 އިން މޮޅުވެ، އާޖެންޓީނާގެ މާރިއޯ ކެމްޕޭސްގެ ގޯލުތަކާއެކު އެ ގައުމުން ފުރަތަމަ ފަހަރަށް ތަށި އުފުލާލި އެވެ. އެހެންނަމަވެސް، ނެދަލެންޑްސްގެ ކުޅުންތެރިން މެޑަލް ބަލައިނުގަނެ ދަނޑުން ފޭބި ފޭބުމަކީ، އެ ތަށީގެ ފަހަތުގައި އޮތް ސިޔާސީ ނުފޫޒާއި އިންސާފެއް ނެތް އަމަލުތަކަށް އެ ގައުމުން ދިން ރައްދުކަމުގައި ތާރީހުގައި ވަނީ ލިޔެވިފަ އެވެ. އެ ފަހަރުގެ މުބާރަތަށް ޓިއުނީޝިއާ އަލަށް ކޮލިފައިވި އެވެ. އަދި ގުރޫޕް ސްޓޭޖުގައި މެކްސިކޯގެ މައްޗަށް 3-1 ން ކުރި ހޯދައި އެފްރިކާ ބައްރުގެ ޓީމަކުން ވޯލްޑް ކަޕް މެޗެއް ފުރަތަމަ ފަހަރަށް ކާމިޔާބު ކުރުމުގެ ޝަރަފް ޓިއުނީޝިއާއިން ހޯދި އެވެ.