މިފަހަރުގެ ވޯލްޑް ކަޕަށް އޮސްޓްރިއާ ކޮލިފައިވީ 1998 ވަނަ އަހަރަށް ފަހު ފުރަތަމަ ފަހަރަށެވެ. ވޯލްޑް ކަޕަށް 28 އަހަރު ފަހުން އެގައުމު ކޮލިފައިވީ ގްރޫޕުގެ އެއް ވަނަ ހޯދައިގެންނެވެ. ކޮލިފައިންގައި ވާދަކުރީ ބޮސްނިއާގެ އިތުރުން ރުމޭނިއާ އާއި ސައިޕްރަސް އަދި ސެން މެރީނޯއާ އެވެ. އެއް ވަނަ ހޯދީ 8 މެޗުން 19 ޕޮއިންޓް ހޯދައިގެންނެވެ. އެ މެޗުތަކުގައި 22 ގޯލު ޖެހިއިރު ބައިކޮޅަށް ވަނީ އެންމެ ހަތަރު ގޯލެވެ.

ވޯލްޑް ކަޕްގެ ފުރަތަމަ މުބާރާތްތަކުގައި އޮސްޓްރިއާ އަކީ ކާމިޔާބު ގައުމެކެވެ. އެގޮތުން 1934 ވަނަ އަހަރުގެ މުބާރާތާއި، 1954 ވަނަ އަހަރުގެ ވޯލްޑް ކަޕްގެ ހަތަރު ވަނަ ހޯދި އެވެ. އަނެއް ފަސް މުބާރާތުގައި އެ ގައުމު ކެޓީ ގްރޫޕް ސްޓޭޖުންނެވެ.

ވޯލްޑް ކަޕާ އެގައުމު ކުރިމަތިލާއިރު އެންމެ ފަހުގެ ޔޫރޯގައި އެ ގައުމު ވަނީ ފްރާންސާއި ނެދަލެންޑްސް ހިމެނުނު ގްރޫޕުގެ އެއް ވަނަ ހޯދައި ގަދަ 16 އަށް ދަތުރުކޮށްފަ އެވެ. އެ ބުރުގައި ހަނި ގޮތަކަށް ބަލިވީ ތުރުކީ އަތުންނެވެ.

ކޯޗު: ރަލްފް ރަންގްނިކް (67 އަހަރު)

"ފުޓްބޯޅަ ޕްރޮފެސަރު" ގެ ނަމުން މަޝްހޫރުކަން ހޯދާފައިވާ ރަންގްނިކަކީ "ކައުންޓަރ-ޕްރެސިން" އަށް މަޝްހޫރު ކޯޗެކެވެ. އަވަހަށް ބޯޅަ ރިކަވާ ކުރުމާއި އެ ބޯޅަ އެޓޭކަށް ބަދަލުކުރުމަކީ ރަންގްނިކްގެ ހާއްސަ ސިފައެކެވެ. އޭނާގެ މި އުކުޅުތައް ފުޓްބޯޅައިގައި ތަންފީޒުކުރި ކޯޗުންގެ ތެރޭގައި ޔާގެން ކްލޮޕާއި ތޯމަސް ޓުޗެލް އަދި ހޫލިއަން ނާގަލްސްމަން ހިމެނެ އެވެ.

ކޯޗިންގައި ރަންގްނިކް ވަނީ އާދައިގެ ޓީމުތަށް ދުނިޔޭގެ ސަމާލުކަން ލިބޭ ޓީމުތަކަށް ހަދައިފަ އެވެ. އޮސްޓްރިއާގެ އާރުބީ ލައިޕްޒިގަށް އިރުޝާދުދީ އެ ޓީމު ޖަރުމަނުގެ ހަތަރު ވަނަ ޑިވިޝަނުން ޗެމްޕިއަންސް ލީގު ސެމީ ފައިނަލާ ހަމައަށް ގެންގޮސްދިނެވެ. އޭނާގެ ކޯޗުކަމުގައި ޖަރުމަނުގެ ޝާލްކޭ ވެސް 2011 ވަނަ އަހަރުގެ ޗެމްޕިއަންސް ލީގު ސެމީ ފައިނަލަށް ދަތުރުކުރި އެވެ. ޖަރުމަނުގެ ހޮފެންހައިމް ތިން ވަނަ ޑިވިޝަނުން ޖަރުމަނު ލީގަށް ކޮލިފައިކޮށްދިނެވެ. މި ކްލަބްތަކާއެކު ހޯދި ކުރިއެރުމުގެ އިތުރުން، މެންޗެސްޓާ ޔުނައިޓެޑަށް އިރުޝާދުދިނުމަކީ ވެސް ރަންގްނިކްގެ ކޯޗިން ކެރިއަރުގެ މުހިއްމު ބައެކެވެ. 

މުހިއްމު ކުޅުންތެރިން

އޮސްޓްރިއާގައި އަދިވެސް އެންމެ ފާހަގަކުރެވެނީ އެގައުމުގެ ތަޖުރިބާކާރު ކުޅުންތެރިންނެވެ. މިގޮތުން ސާބިއާ ލީގުގައި ކުޅެމުން އަންނަ 37 އަހަރުގެ މާކޯ އަނާޓޮވިޗް ކޮލިފައިންގައި 8 ގޯލު ޖެހި އެވެ. ބޮރޫޝިއާ ޑޯޓްމަންޑަށް ކުޅޭ 32 އަހަރުގެ މާސެލް ސަބިޓްޒާ ކޮލިފައިންގައި ތިން ގޯލު ޖަހަން އެހީތެރިވެ 13 ފުރުސަތު ތަނަވަސްކުރި އެވެ. މި ދެކުޅުންތެރިންނާ އެކު ކެޕްޓަން ޑޭވިޑް އަލަބާގެ ދައުރު މިފަހަރުގެ މުބާރާތުގައި ވެސް ބޮޑުވާނެ އެވެ. މިހާރު އުމުރުން 33 އަހަރުގެ އަލަބާ ކުޅެމުން އަންނަނީ ރެއާލް މެޑްރިޑަށެވެ.