މިއީ ވޯލްޑް ކަޕަށް ޖޯޑަން ކޮލިފައިވި ފުރަތަމަ ފަހަރެވެ. ވޯލްޑް ކަޕްގެ ޖާގައެއްގެ އިތުރުން 2023 ވަނަ އަހަރުގެ އޭޝިއަން ކަޕްގެ ފައިނަލަށް ދަތުރުކޮށް 2025 ވަނަ އަހަރުގެ ފީފާ އަރަބް ކަޕް ފައިނަލުގައި އެގައުމު ކުޅުނެވެ. އޭޝިއަން ކަޕްގެ ފައިނަލުގައި ގަތަރު އަތުން ބަލިވިއިރު އަރަބް ކަޕްގެ ފައިނަލުގައި ބަލިވީ މޮރޮކޯ އަތުންނެވެ. މި ތާރީހީ ކާމިޔާބީތަކާ އެކު ޖޯޑަންގައި މިވަގުތު އޮތީ އެގައުމުގެ ރަން ޖީލެއް ކަމަށް ފުޓްބޯޅައިގެ ތަޖުރިބާކާރުން ގަބޫލުކުރެ އެވެ.

އޭޝިއާ ބައްރުގެ ކޮލިފައިންގެ ދެ ވަނަ ބުރުގައި ޖޯޑަން ވަނީ ސައުދީ އަރަބިއާ ފަހަތަށް ޖައްސާލައި ގްރޫޕުގެ އެއް ވަނަ ހޯދައިފަ އެވެ. ތިން ވަނަ ބުރުގައި ދެކުނު ކޮރެއާގެ ފަހަތުން ދެ ވަނަ ހޯދައި ވޯލްޑް ކަޕްގެ އޮޓަމެޓިކް ޖާގައެއް ކަށަވަރުކުރި އެވެ. މި ބުރުގައި ކުޅުނު 10 މެޗުގެ ތެރެއިން ހަތަރު މެޗު ކާމިޔާބުކޮށް ހަތަރު މެޗު އެއްވަރުކުރި އެވެ. ބަލިވީ ދެ މެޗުންނެވެ. 

ކޯޗު: ޖަމާލް ސެލާމީ (55 އަހަރު)

ކުރިން މޮރޮކޯ ގައުމީ ޓީމަށް ކުޅުނު ޖަމާލް ސެލާމީ ޖޯޑަންއާ ހަވާލުވީ 2024 ވަނަ އަހަރުގެ އޮގަސްޓް މަހު އެވެ. ގައުމީ ޓީމަކާ އެކު ކުރާ ފުރަތަމަ ތަޖުރިބާގައި ޖޯޑަން ވޯލްޑް ކަޕަށް ކޮލިފައިވުމަކީ ބޮޑު ކާމިޔާބީއެކެވެ. އަދި އަރަބް ކަޕުގެ ދެ ވަނަ އެގައުމަށް ހޯދައިދިނެވެ.

ޖޯޑަންގެ ފުޓްބޯޅަ އަށް ސެލާމީ ގެނެސްދިން ކުރިއެރުމާ އެކު އެގައުމުގެ ރަސްގެފާނު ކިންގް އަބްދުﷲ ވަނީ ސެލާމީ އަށް ޖޯޑަންގެ ރަށްވެހިކަން ހުށަހަޅުއްވައިފަ އެވެ. އަދި އަރަބް ކަޕުގެ ފައިނަލަށް ފަހު 2025 ވަނަ އަހަރު ސެލާމީ ވަނީ އޭނާ ޖޯޑަން އަށް ރަށްވެހިކަން ބަދަލުކުރިކަން އިއުލާނުކޮށްފަ އެވެ. 

މުހިއްމު ކުޅުންތެރިން

ކޮލިފައިންގައި ޖޯޑަން ޓީމުން އެންމެ ވިދާލީ ނުވަ ގޯލު ކާމިޔާބުކޮށްދިން އަލީ އޮލްވާން އެވެ. އޭނާގެ އިތުރުން އެޓީމުގެ މޫސާ އަލް-ޓާމަރީ ވަނީ ކޮލިފައިންގައި ހަތް ގޯލު ޖަހައިފަ އެވެ. މިހާރު ފްރެންޗް ލީގުގެ ރެނެސް އަށް ކުޅެމުން އަންނަ މޫސާ އަކީ ފްރާންސްގެ އެންމެ މަތީ ލީގުގައި ކުޅުނު އެގައުމުގެ ފުރަތަމަ ކުޅުންތެރިޔާ އެވެ. އެޓޭކުގައި ހިމެނޭ ޔަޒާން އަލް-ނައިމަތު އަކީ ވެސް މުހިއްމު ކުޅުންތެރިއެކެވެ. ކޮލިފައިންގައި އޭނާ 8 ގޯލު ޖެހި އެވެ. އަދި އޭޝިއާ ކޮލިފައިންގެ ފައިނަލް ބުރުގައި އެންމެ ގިނަ ގޯލު ޖެހީ ވެސް ޔަޒާން އެވެ.