ވޯލްޑް ކަޕްގެ ތާރީހް:
ސްވިޒަލެންޑަކީ މީގެކުރިން އަށް ފަހަރު ވޯލްޑް ކަޕްގައި ކުޅެފައިވާ ތަޖުރިބާ ބޮޑު ޓީމެކެވެ. ސްވިޒަލެންޑް އެންމެ ފުރަތަމަ ވޯލްޑް ކަޕްގައި ކުޅުނީ 1934 ވަނަ އަހަރު އެވެ. އެގައުމު ވަނީ އެންމެ ފަހުން އޮތް ތިން ވޯލްޑް ކަޕްގައި ވެސް ކުޅެފަ އެވެ. ވޯލްޑް ކަޕުން ސްވިޒަލެންޑަށް އެންމެ ފަހުން ފުރުސަތު ނުލިބުނީ 2002 ވަނަ އަހަރު އެވެ. ވޯލްޑް ކަޕްގެ ތާރީހުގައި އެގައުމު އެންމެ ކުރިއަށް ދިޔައީ 1934، 1938 އަދި 1954 ވަނަ އަހަރު އެވެ. އެ ތިން މުބާރާތުގައި ވެސް އެގައުމު ވަނީ ކުއާޓާ ފައިނަލުގައި ވާދަކޮށްފަ އެވެ. 1954 ވަނަ އަހަރު އަމިއްލަ ގައުމުގައި އޮތް ވޯލްޑް ކަޕުން ކެޓީ ކުއާޓާ ފައިނަލުގައި އޮސްޓްރިއާ އަތުން ބަލިވެގެންނެވެ.
ފުޓްބޯޅައިގައި ސްވިޒަލެންޑަށް ލިބުނު އެންމެ ބޮޑު ކާމިޔާބީއަކީ ވޯލްޑް ކަޕް ކުއާޓާ ފައިނަލަށް ދަތުރުކުރެވުމެވެ. މީގެ އިތުރުން އެގައުމު ވަނީ މިދިޔަ އަހަރު އޮތް ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުގައި ވެސް ވާދަކޮށްފަ އެވެ. ކުރީގެ ތާރީހަށް ބަލާއިރު ސްވިޒަލެންޑް ވަނީ 1924 ވަނަ އަހަރުގެ އޮލިމްޕިކްސް ގޭމްސްގެ ރިހި މެޑަލް ހޯދާފަ އެވެ.
ކޮލިފައިވި ގޮތް:
ސްވިޒަލެންޑް ވޯލްޑް ކަޕަށް ކޮލިފައިވީ ޔޫރަޕުން އެޓީމު ހިމެނުނު ގްރޫޕް ސީގެ އެއް ވަނަ ހޯދައިގެންނެވެ. މި ގްރޫޕުގައި ސްވިޒަލެންޑުގެ އަތްދަށުގެ ދެ ވަނަ ލިބުނު އިޓަލީ މިފަހަރުގެ ވޯލްޑް ކަޕުން ނުފެންނާނެ އެވެ. ކޮލިފައިންގައި ކުޅުނު އަށް މެޗުގައި ސްވިޒަލެންޑް ބަލިވެފައެއްނުވެ އެވެ. ފަސް މެޗުން މޮޅުވިއިރު ތިން މެޗު ނިމުނީ އެއްވަރުވެގެންނެވެ. އެޓީމު ގްރޫޕުގެ އެއް ވަނަ 18 ޕޮއިންޓާ އެކު ހޯދިއިރު އިޓަލީ އަށް ދެ ވަނަ ލިބުނީ 16 ޕޮއިންޓާ އެކު އެވެ. ކޮލިފައިންގެ މި ގްރޫޕުގައި ދެން ހިމެނުނީ ނޮދާން އަޔަލެންޑާއި ބަލްގޭރިއާ އަދި ލިތުއޭނިއާ އެވެ.
ކޯޗު: މުރާތު ޔަކިން
ސްވިޒަލެންޑުގެ ކޯޗު މުރާކު ޔަކިން މަގާމާ ހަވާލުވީ މިދިޔަ އަހަރުގެ އޮގަސްޓް މަހު އެވެ. ޔަކިން އަށް ސްވިޒަލެންޑުގެ ކޯޗުކަން ލިބުނީ އެގައުމުގެ ތާރީހުގައި އެންމެ ކާމިޔާބު ކޯޗު ވްލަޑިމިރް ޕެޓްކޮވިޗް ހަތް އަހަރަށް ފަހު އެ މަގާމް ދޫކޮށްލުމުންނެވެ. ޔަކިންއާ ހަވާލުވިއިރު ސްވިޒަލެންޑް އޮތީ ކޮލިފައިންގެ ދެ މެޗު ކުޅެފަ އެވެ. ފުރަން އުނދަގޫ މަގާމެއްގައި ހުރެ ޔަކިން ވަނީ ހީކުރި ވަރަށްވުރެ ރަނގަޅު ނަތީޖާތަކެއް ސްވިޒަލެންޑާ އެކު ނެރެފަ އެވެ. ޔޫރަޕްގެ ޗެމްޕިއަން އިޓަލީގެ މައްޗަށް ކުރި ހޯދައި އޮޓަމެޓިކް ކޮލިފިކޭޝަން ހޯދައިދިނުމުން ޔަކިންއާ މެދު ސްވިޒަލެންޑުގެ އިތުބާރު މިހާރު ވަނީ ބޮޑުވެފަ އެވެ.
އުމުރުން 48 އަހަރުގެ ޔަކިން ވަނީ 1994 އިން 2004 އާ ދެމެދު ސްވިޒަލެންޑުގެ ގައުމީ ޓީމަށް 49 މެޗު ކުޅެ ހަތަރު ގޯލު ޖަހައިފަ އެވެ.
ވޯލްޑް ކަޕަށް ސްވިޒަލެންޑް ކޮލިފައިވީ، ކޮލިފައިންގައި ނޮދާން އަޔަލެންޑުން އިޓަލީއާ އެއްވަރުކުރި މެޗާ އެކު އެވެ. ކުޅިބަލަން ތިއްބައި ވޯލްޑް ކަޕްގެ ފުރުސަތު ލިބުމުން ޔަކިން ވަނީ އަޔަލެންޑުގެ ފުޓްބޯޅަ އެސޯސިއޭޝަނަށް 9.3 ކިލޯގެ ސްވިސް ޗޮކްލެޓް ހަދިޔާކޮށްފަ އެވެ.
ފާހަގަކޮށްލެވޭ ކުޅުންތެރިން:
ޔަން ސޮމާ
ޔަން ސޮމާ އަކީ ޓީމުގެ ހިތެވެ. މުޅި ސްވިޒަލެންޑް ފަހުރުވެރިވާ ސޮމާ އަކީ އެގައުމުގެ ފުޓްބޯޅަ އެއް ފެންވަރެއްގައި އޮތުމުގައި މުގުލުގައި ހުރި ކުޅުންތެރިޔާ އެވެ. އުމުރުން 33 އަހަރުގެ ސޮމާ ފާހަގަކުރެވެނީ ބައިނަލްއަގްވާމީ މުބާރާތްތަކުގައި ވިދުން ގަދަ ކުޅުންތެރިއެއްގެ ގޮތުގަ އެވެ. މީގެ އިތުރުން ޕެނަލްޓީ މަތަކުރުމުގައި ވެސް ސޮމާ އަކީ އާދަޔާހިލާފު މޮޅު ކީޕަރެކެވެ. މިދިޔަ އަހަރުގެ ޔޫރޯގެ ދެ ވަނަ ބުރުގައި ގަދަފަދަ ފްރާންސް ޕެނަލްޓީ ޖަހައިގެން ބަލިކުރިއިރު އެގައުމުގެ ހީރޯ އަކީ ޕެނަލްޓީގައި ތަފާތު ދެއްކި ސޮމާ އެވެ.
2012 ވަނަ އަހަރުން ފެށިގެން ގައުމީ ޓީމުން ޖާގަ ހޯދައި ސޮމާ ވަނީ މިހާތަނަށް 74 މެޗު ކުޅެފަ އެވެ. ސޮމާ ވަނީ ރަޝިއާގައި 2018 ވަނަ އަހަރު އޮތް ވޯލްޑް ކަޕްގެ އިތުރުން އެންމެ ފަހުން ކުޅުނު ޔޫރޯ ދެ ފުޓްބޯޅަ މުބާރާތުގައި ވެސް އެގައުމުގެ ގޯލު ބަލަހައްޓާފަ އެވެ.
ކްލަބް ފުޓްބޯޅައިގައި މަޝްހޫރު ކްލަބްތަކުން ފާރަލި ނަމަވެސް ސޮމާ އޭގެއިން އެއްވެސް ފުރުސަތެއްގެ ބޭނުމެއް ނުހިފަ އެވެ. 2014 ވަނަ އަހަރުން ފެށިގެން އޭނާ ކުޅެމުން އަންނަނީ ޖަރުމަނު ލީގުގެ ބޮރޫޝިއާ މޮންޗެންގްލަދްބާއާ އަށެވެ. އޭގެކުރިން ސްވިޒަލެންޑުގެ ބަސެލް އަށް ވެސް ސޮމާ ވަނީ ކުޅެފަ އެވެ.

ގްރަނިޓް ޒަކާ
ދަނޑުމަތީގައި ނުފޫޒުގަދަ ޒަކާ އަކީ ވޯލްޑް ކަޕަށް ދާއިރު ސްވިޒަލެންޑުގެ އެންމެ ތަޖުރިބާކާރު އެއް ކުޅުންތެރިޔާ އެވެ. އާސެނަލްގައި މި ސީޒަނުގައި މޮޅު ކުޅުމެއް ދައްކަމުން އަންނަ އުމުރުން 29 އަހަރުގެ ޒަކާ މިހާރު ވެސް ވަނީ 100 އަށް ވުރެ ގިނަ މެޗު ގައުމީ ޓީމަށް ކުޅެފަ އެވެ. 106 މެޗުގައި 12 ގޯލު ޖެހިއިރު ވޯލްޑް ކަޕްގައި އެގައުމުގެ ކެޕްޓަންކަން ކުރާނީ ޒަކާ އެވެ.
ރުޅިގަދަ ކުޅުންތެރިއެއްގެ ގޮތުގައި ފާހަގަކުރެވޭ ޒަކާ އަކީ ދުރުން މޮޅެތި ޕާސް ދިނުމާއި ގޯލު ޖެހުމުގައި ފާހަގަކޮށްލެވޭ ކުޅުންތެރިއެކެވެ. ވޯލްޑް ކަޕް ކޮލިފައިންގައި ސްވިޒަލެންޑް ކުޅުނު އަށް މެޗުގެ ތެރެއިން އަނިޔާގެ ސަބަބުން ހަ މެޗުގައި ޒަކާ އަށް ނުކުޅެވުނެވެ. އެކަމަކު އަނިޔާއިން ރަނގަޅުވެ މިއަހަރު އެގައުމު ކުޅުނު ބައިނަލްއަގްވާމީ ހަ މެޗުގައި ވެސް ފުރަތަމަ އެގާރައިގައި ޒަކާ ވަނީ ކުޅެފަ އެވެ.

ބްރީލް އެމްބޮލޯ
ބްރީލް އެމްބޮލޯ އަކީ ވޯލްޑް ކަޕް ކޮލިފައިންގައި އެގައުމަށް އެންމެ ގިނަ ގޯލު ޖަހައިދިން ކުޅުންތެރިޔާ އެވެ. ތިން ގޯލާ އެކު އެ ލިސްޓުގެ އެއް ވަނަ އެމްބޮލޯ ހޯދިއިރު އޭނާ މިހާރު ކުޅެމުން އަންނަނީ ފްރާންސްގެ މޮނާކޯ އަށެވެ. އުމުރުން 25 އަހަރުގެ ފޯވާޑް މީގެ ކުރިން ވަނީ ބަސެލް، ޝާލްކޭ، ބޮރޫޝިއާ މޮންޗެންގްލަދްބާ އަށް ވެސް ކުޅެފަ އެވެ.
ކެމެރޫނަށް އުފަންވި ނަމަވެސް އެމްބޮލޯ ތަމްސީލުކުރަމުން އަންނަނީ 2014 ވަނަ އަހަރު އޭނާ ރަށްވެހިކަން ބަދަލުކުރި ސްވިޒަލެންޑަށެވެ. އެމްބޮލޯގެ މަންމަ އާއި ބައްޕަ ވަކިވުމުން މަންމަ އާއި އެކު އުމުރުން ފަސް އަހަރުގައި އެމްބޮލޯ ބަދަލުވީ ފްރާންސަށެވެ. އޭގެފަހުން ސްވިޒަލެންޑަށް ދިރިއުޅުން ބަދަލުކުރީ އެގައުމަށް ނިސްބަތްވާ ދޮންބައްޕައާ އެކު އެވެ.
ސްވިޒަލެންޑުގެ އުމުރުފުރާ ގައުމީ ޓީމުތަކަށް ކުޅުމަށް ފަހު އެމްބޮލޯ ސީނިއާ ޓީމަށް ކުޅެންފެށީ 2015 ވަނަ އަހަރު އެވެ. އޭނާ ވަނީ މިހާތަނަށް ގައުމީ ޓީމަށް ކުޅުނު 58 މެޗުގައި 11 ލަނޑު ޖަހައިފަ އެވެ.
ގްރޫޕްގަ އޮތް ފުރުސަތު:
މި ގްރޫޕުގައި ހިމެނޭ ބްރެޒިލް އާއި ސާބިއާއާ ދެކޮޅަށް 2018 ވަނަ އަހަރުގެ ވޯލްޑް ކަޕް ގްރޫޕް ސްޓޭޖުގައި ވެސް ސްވިޒަލެންޑް ވަނީ ކުޅެފަ އެވެ. އެ ދެމެޗުގެ ތެރެއިން ބްރެޒިލްއާ 1-1 އިން އެއްވަރުކުރިއިރު ސާބިއާ އަތުން އެޓީމު ވަނީ 2-1 އިން މޮޅުވެފަ އެވެ. މިއީ ކެމެރޫންއާ ދެކޮޅަށް ބައިނަލްއަގްވާމީ މެޗެއްގައި ސްވިޒަލެންޑް ނުކުންނަ ފުރަތަމަ ފަހަރެވެ.
މިދިޔަ އަހަރުގެ ޔޫރޯ އާއި ވޯލްޑް ކަޕް ކޮލިފައިންގައި އެޓީމު ނެރުނު ނަތީޖާތައް ދަމަހައްޓައިފި ނަމަ ވޯލްޑް ކަޕްގެ އަނެއް ބުރަށް އެޓީމަށް ދެވޭނެ އެވެ. ޔޫރޯގެ ދެ ވަނަ ބުރުގައި ފްރާންސް ކަޓުވާލުމަށް ފަހު ކުއާޓާ ފައިނަލުގައި ސްޕެއިން އަތުން އެޓީމު ބަލިވީ ޕެނަލްޓީ ޖަހައިގެންނެވެ.
ވޯލްޑް ކަޕް ކޮލިފައިންގެ އަށް މެޗުގައި 15 ގޯލު ޖެހިއިރު އެޓީމު ކޮޅަށް ވަނީ އެންމެ ދެ ގޯލެވެ. އެކަމަކު މިއަހަރު ކުޅުނު ޔޫއެފާ ނޭޝަންސް ލީގުގެ ފުރަތަމަ ތިން މެޗުގައި ޗެކް ރިޕަބްލިކާއި ޕޯޗުގަލް އަދި ސްޕެއިން އަތުން ސްވިޒަލެންޑް ވަނީ ބަލިވެފަ އެވެ. ނޭޝަންސް ލީގުގެ ގްރޫޕުގައި ސްޕެއިން އާއި ޕޯޗުގަލްގެ ފަހަތުން ސްވިޒަލެންޑަށް ލިބުނީ ތިން ވަނަ އެވެ. އެކަމަކު ވޯލްޑް ކަޕްގެ ކުރިން ސެޕްޓެމްބަރު މަހު ކުޅުނު މެޗުތަކުގައި ސްޕެއިން އާއި ޗެކް ރިޕަބްލިކް އަތުން އެޓީމު ވަނީ މޮޅުވެފަ އެވެ.