ޒުވާން އުމުރުގައި ބްރެޒިލްގެ ގައުމީ ޓީމަށް ކުޅެ، ގޯލު ޖަހައި އޭނާ ވަނީ ޒަމާން ވީ ރެކޯޑްތަކެއް މުގުރާލައިފަ އެވެ. އެއަށް ފަހު 2024 ގައި އެންޑްރިކް ވަނީ ކޮޕާ އެމެރިކާ މުބާރާތުގައި ވެސް ކުޅެފަ އެވެ. އެ މުބާރާތުގެ ކުއާޓާ ފައިނަލްގައި އެންޑްރިކް ވަނީ ފުރަތަމަ ފަހަރަށް ބްރެޒިލް ގައުމީ ޓީމާއެކު މެޗެއް ސްޓާޓް ކޮށްފަ އެވެ.
ނަމަވެސް އެ މެޗު ވީ އޭނާ ހަނދާނުން ފޮހެލަން މަޖުބޫރުވާ ފަދަ މެޗަކަށެވެ. އުރުގުއޭ އަތުން ޕެނަލްޓީ ޖަހައިގެން ބްރެޒިލް ބަލިވި އެ މެޗުގައި އެންޑްރިކް އަށް ފުރިހަމަ ކުރެވުނީ އެންމެ ޕާހެކެވެ. އެއީ މެޗު ފަށަން ކިކޯފްގައި އޭނާ ޖެއްސި ބޯޅައިންނެވެ. އެ މެޗަށް ފަހު އެންޑްރިކް އަށް ގިނަ ފާޑުކިޔުންތަކެއް އަމާޒުވި އެވެ.
ރެއާލް މެޑްރިޑްގައި އޭނާ އަށް ލިބޭ ފުރުސަތުތައް މަދު ވުމުން، ކާލޯ އަންޗެލޮޓީގެ ބްރެޒިލް ސްކޮޑުން ވެސް އޭނާ އަށް ފުރުސަތު ހަނިވި އެވެ. މިއާ އެކު އޭނާ ވަނީ މިދިޔަ ޑިސެމްބަރު މަހު، ހަ މަހުގެ ލޯނެއްގައި ފްރާންސްގެ ލިޔޯން އަށް ބަދަލު ވެފަ އެވެ. ވޯލްޑް ކަޕްގައި ކުޅެން ބްރެޒިލް ގައުމީ ޓީމުން ފުރުސަތު ހޯދުމުގެ އުންމީދުގަ އެވެ. ލިޔޯން އާއެކު ލިބޭ މަދު ފުރުސަތުތަކުގައި އެންޑްރިކް އަންނަނީ އޭނާގެ ހުނަރު ދައްކާލަމުންނެވެ.
އުމުރުން 19 އަހަރުގެ އެންޑްރިކް ވަނީ މިހާތަނަށް ގައުމީ ޓީމަށް 15 މެޗުން ތިން ގޯލު ޖަހައިދިފަ އެވެ.