ލޯނު އުސޫލުން ވުލްވްސް އަށް ކުޅެމުން ދިޔަ ވިޓީނިއާ 2022 ވަނަ އަހަރު ޕީއެސްޖީން ގެންދިޔައީ ޕޯޓޯ އާއެކު އޭނާގެ ރިލީޒް ކްލޯސް ދައްކައިފަ އެވެ. މި ޓްރާންސްފާ އަކީ ގިނަ ބަޔަކު ސުވާލު ވެސް އުފެއްދި ޓްރާންސްފާ އެކެވެ. ނަމަވެސް ފުރަތަމަ ދުވަހުން ފެށިގެން އޭނާ ސާބިތު ކޮށްދެމުން އަންނަނީ ޕީއެސްޖީން އޭނާއަށް ހޭދަކުރީ ބޭކާރު ފައިސާއެއް ނޫން ކަމެވެ. ޕީއެސްޖީއަށް ފުރަތަމަ ޗެމްޕިއަންސް ލީގު ކާމިޔާބު ކޮށްދީ، އޭނާ ވަނީ މިދިޔަ އަހަރުގެ ބެލޮންޑީއޯ ލިސްޓުގެ ތިން ވަނަ ހޯދައިފަ އެވެ. އޭނާ އަކީ ގިނަ ކްލަބްތަކަކުން ޝައުގުވެރި ވާ މިޑްފީލްޑަރެކެވެ. ޕީއެސްޖީގައި ނުފޫޒު ވެސް ގަދަ މި ކުޅުންތެރިޔާ އަށް ރެއާލް މެޑްރިޑުން ވެސް ފާރަލަ އެވެ. މި ސީޒަންގައި ވެސް ވަނީ އޭނާގެ މޮޅު ކުޅުން ތަކުރާރު ކޮށްފަ އެވެ. ރޮނާލްޑޯގެ ފަހު ވޯލްޑް ކަޕް ޕޯޗުގަލް އަށް ކާމިޔާބު ކޮށްދޭން އެ ޓީމުގައި ހިމެނޭ އެންމެ މުހިއްމު އެއް ކުޅުންތެރިޔަކީ ވިޓީނާ އެވެ.