ރަޝިއާ 2018 ގެ ވޯލްޑް ކަޕްގެ ރަން ބޫޓު ހޯދި ހެރީ ކޭން މި އަހަރު މުރިމަތިލަނީ އޭނާގެ ތިން ވަނަ ވޯލްޑް ކަޕަށެވެ. އޭރު ވެސް މިހާރު ވެސް ބަދަލު ނުވެ އޮތް ކަމަކީ އޭނާގެ ގޯލް ޖެހުމުގެ ހުނަރެވެ. ޕެނަލްޓީ ބޮކްސް ސްޓްރައިކަރަކުން ޕްލޭމޭކިން ފޯވާޑަކަށް ބަދަލުވެ، އޭނާގެ ކުޅުން ވެސް ވަނީ ކުރިއަށް ވުރެ ތަފާތު ވެފަ އެވެ. ވޭން ރޫނީ ވެސް ކެރިއަރުގެ ފަހު ކޮޅު ކުރިއަރައި ދިޔައީ މިކަހަލަ ގޮތަކަށެވެ. ކޭން ވަނީ ގަތަރު 2022 ވޯލްޑް ކަޕްގެ ކުއާޓާ ފައިނަލްގައި ފްރާންސް ކޮޅަށް ގޯލު ޖަހައި، އިންގްލެންޑަށް އެންމެ ގިނަ ލަނޑު ޖަހައިފައިވާ ރޫނީގެ ރެކޯޑާ އެއްވަރު ކޮށްފަ އެވެ. އެއަށް ފަހު އޭނާ ވަނީ އެ ރެކޯޑް މުގުރާލައި ޖުމްލަ 78 ގޯލު ޖަހައިފަ އެވެ. ބެޔާން މިއުނިކާ އެކު އޭނާ ނިމުނު ސީޒަނުގައި ހުރީ ފޯމުގަ އެވެ. އިންގްލެންޑުން ވޯލްޑް ކަޕް ކާމިޔާބުކުރަން ބޭނުންވާނެ އެންމެ މުހިއްމު ހަތިޔާރަކީ އޭނާ އެވެ.

ވޯލްޑް ކަޕްގެ ޗެމްޕިއަންކަން މަޝްހޫރު އިންގްލެންޑަށް ލިބުނީ އަމިއްލަ ގައުމުގައި 1966 ވަނަ އަހަރު ކުޅުނު މުބާރާތުގައި އެކަންޏެވެ. ވޯލްޑް ކަޕްގެ އެހެން އެއްވެސް މުބާރާތެއްގެ ފައިނަލަކަށް ވެސް އެގައުމަށް ނުދެވެ އެވެ.

ކްލަބް ފުޓްބޯޅައިގައި އެގައުމުގެ ކްލަބްތައް އުހުގައި އޮތަސް، ގައުމީ ޓީމަށް ކާމިޔާބީ ނުހޯދޭތީ ބައިނަލްއަގްވާމީ ފުޓްބޯޅައިގައި އެ ގައުމަށް ކުރިމަތިވަނީ ފާޑުކިޔުމެވެ. އެކަމަކު މިދިޔަ އަށް ވަރަކަށް އަހަރު އެގައުމުން ވަނީ ކުރިއެރުން ހޯދައިފަ އެވެ. މި މުއްދަތުގައި ވޯލްޑް ކަޕުގެ ސެމީ ފައިނަލުގައި 2018 ވަނަ އަހަރު ވާދަކޮށް ބަލިވި އެވެ. ޔޫރޯގެ ދެ ފައިނަލުގައި 2020 އަދި 2024 ގައި ބަލިވި އެވެ. ގަތަރުގައި 2022 ވަނަ އަހަރު އޮތް ވޯލްޑް ކަޕްގައި އެގައުމު ކެޓީ ކުއާޓާ ފައިނަލުންނެވެ.

ތައްޓަކާ ހަމައަށް ނުދެވުނަސް ފަހަކަށް އައިސް އިންގްލެންޑުން ހޯދި ކުރިއެރުމަކީ އެ ގައުމުގެ ސަޕޯޓަރުންނަށް ލިބިފައިވާ އުއްމީދެކެވެ.

ވޯލްޑް ކަޕްގެ ޖާގަ އިންގްލެންޑް ހޯދީ ކޮލިފައިންގައި ކުޅުނު އަށް މެޗުން ވެސް މޮޅުވެގެންނެވެ. އެޓީމު ކޮޅަށް ކޮލިފައިންގައި އެންމެ ގޯލެއް ވެސް ނުދަވެ އެވެ. އަށް މެޗުގައި 22 ގޯލު ޖެހި އެވެ. 

ކޯޗު: ތޯމަސް ޓުޗެލް (52 އަހަރު)

ޓުޗެލް އަކީ ކުރު މުއްދަތުގައި ނަތީޖާ ނެރޭ ޒަމާނީ ފުޓްބޯޅައިގެ ކޯޗެކެވެ. ބޮރޫޝިއާ ޑޯޓްމަންޑާއި، ޕީއެސްޖީގެ އިތުރުން ޗެލްސީ އަދި ބަޔާން މިއުނިކްގައި ޓުޗެލް ތަށި ހޯދި އެވެ. އޭގެ ތެރެއިން އެންމެ ފާހަގަކޮށްލެވޭ ކާމިޔާބީއަކީ ޗެލްސީއާއެކު 2021 ވަނަ އަހަރު ޗެމްޕިއަންސް ލީގާއި ކްލަބް ވޯލްޑް ކަޕް ޔޫއެފާ ސުޕަ ކަޕް ކާމިޔާބުކުރުމެވެ. އެ އަހަރު ފީފާ އިން ހޮވި އެންމެ މޮޅު ކޯޗުގެ މަގާމް ވެސް ޓުޗެލް ހޯދި އެވެ.

ޓުޗެލްއާ 2025 އަހަރު އިންގްލެންޑް ހަވާލުކުރިއިރު އޮތީ އެންމެ އަމާޒެކެވެ. އެއީ މިފަހަރުގެ ވޯލްޑް ކަޕް ކާމިޔާބުކުރުމެވެ. އެ އަމާޒަށް ދިއުމަށް ޓުޗެލް ފަށާފައިވާ ދަތުރުގައި މިހާތަނަށް 75 އިންސައްތަ މެޗު ވަނީ ކާމިޔާބުކޮށްފަ އެވެ. 

މުހިއްމު ކުޅުންތެރިން

އިންގްލެންޑުގައި ތިބީ ހުސް މަގުބޫލު މޫނުތަކެވެ. އެޓީމުގެ އެންމެ މުހިއްމު ކުޅުންތެރިޔަކީ ގޯލު މެޝިން، ހެރީ ކޭން އެވެ. ބަޔާން މިއުނިކްގެ ފޯވާޑަކީ ގައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާ އެވެ. ޑެކްލަން ރައިސް އާއި ބުކަޔޯ ސަކާގެ އިތުރުން ޖޫޑް ބެލިންހަމް އަކީ ވެސް މެދުތެރެއާއި އެޓޭކުގައި މުހިއްމު ކުޅުންތެރިންނެވެ. މިދިޔަ ސީޒަނުގައި މޮޅު ކުޅުމެއް ދެއްކި އެލިއޮޓް އެންޑަސަން އަކީ އަރަމުން އަންނަ މޮޅު ކުޅުންތެރިއެކެވެ. ތަޖުރިބާ އަށް ބަލާއިރު އެޓީމުގެ ގޯލްކީޕަރު ޖޯޑަން ޕިކްފޯޑު ފާހަގަކުރެވެ އެވެ.

އިންގްލެންޑަކީ ފުޓްބޯޅަ އުފަންކުރި ގައުމުގެ ގޮތުގައި މަޝްހޫރުވެފައިވާ ގައުމެވެ. 1966 ވަނަ އަހަރު އެ ގައުމުގައި ބޭއްވި ވޯލްޑް ކަޕަކީ ފުޓްބޯޅައިގައި މިއަދު މިދެކޭ ޒަމާނީ މާކެޓިން އުސޫލުތަކާއި ޓެކްނޮލޮޖީގެ ބިންގާ އެޅުނު މުބާރާތެވެ. މިއީ ވޯލްޑް ކަޕަށް ހާއްސަކޮށް ފުރަތަމަ ފަހަރަށް މެސްކޮޓެއް ތައާރަފްކޮށް، ހާއްސަ ލޯގޯއެއް ބޭނުންކުރަން ފެށި އަހަރެވެ. ހަމައެއާއެކު، ޓީވީން މެޗުތައް ލައިވް ކުރާއިރު މުހިންމު މަންޒަރުތަކުގެ ރިޕްލައި ދެއްކުމާއި، ކުޅުންތެރިންގެ ޑްރަގް ޓެސްޓް ހަދަން ފެށުމަކީ ވެސް މި މުބާރާތުން ފެނުނު އިންގިލާބީ ބަދަލުތަކެވެ.

މި މުބާރާތް ފެށުމުގެ ކުރިން މުޅި އިނގިރޭސި ވިލާތް ސިއްސުވާލި ހާދިސާއަކީ ވޯލްޑް ކަޕްގެ އަސްލު ތަށި ވަގަށް ނެގުމެވެ. ތަށި ހޯދުމަށް ފުލުހުން ކުރި މަސައްކަތް ނާކާމިޔާބުވެފައި ވަނިކޮށް، ނޫސްކަރުދާހަށް އޮޅާލާފައި އޮތް ތަށި ބަގީޗާއެއްގެ ތެރެއިން ހޯދީ 'ޕިކްލްސް' ކިޔާ ކުއްތާއެކެވެ. މި ހާދިސާއާއެކު ޕިކްލްސް ވެގެންދިޔައީ މުޅި ގައުމުގެ ބަތަލަކަށެވެ. މީގެ އިތުރުން، މިއީ ވޯލްޑް ކަޕްގެ ތާރީހުގައި ރޭގަނޑު ބޮކި އަލީގައި މެޗެއް ކުޅުނު ފުރަތަމަ ފަހަރެވެ. 

ސިޔާސީ ގޮތުން ބަލާއިރު، މި މުބާރާތަކީ އެފްރިކާ ބައްރުން ބޮއިކޮޓް ކުރި މުބާރާތެކެވެ. އެއީ އެފްރިކާގެ ޓީމުތަކުން އޭޝިއާގެ ޓީމުތަކާ ދެކޮޅަށް އިތުރު ކޮލިފައިން ބުރެއް ކުޅެން ޖެހޭ ގޮތަށް ފީފާއިން އުސޫލު ބަދަލުކުރުމުންނެވެ. ހަމައެއާއެކު، ނަސްލީ ތަފާތުކުރުންތަކާ ގުޅިގެން ދެކުނު އެފްރިކާ މި މުބާރާތުން ސަސްޕެންޑް ކުރި އެވެ. ނަމަވެސް އޭޝިއާ ބައްރުން ވާދަކުރި އުތުރު ކޮރެއާ ވަނީ ކުއާޓާ ފައިނަލަށް ދަތުރުކޮށް، އެ ޝަރަފު ހޯދި އޭޝިއާގެ ފުރަތަމަ ޓީމުގެ ގޮތުގައި ތާރީހުން ޖާގަ ހޯދާފަ އެވެ.

ފައިނަލް މެޗުގައި އިންގްލެންޑާއި ހުޅަނގު ޖަރުމަން ބައްދަލުކުރި މެޗަކީ މިއަދާ ހަމައަށް ވެސް އެންމެ ބޮޑު ބަހުސެއް ހިނގަމުންދާ މެޗެވެ. އިންގްލެންޑްގެ ޖެފް ހާސްޓް ޖެހި ލަނޑު ގޯލްގެ ރޮނގު ހުރަސްކުރި ކަމާމެދު އުފެދުނު ޝައްކުތަކަކީ ފުޓްބޯޅައިގެ އެންމެ މަޝްހޫރު "ގޯސްޓް ގޯލް" އެވެ. އެހެން ނަމަވެސް، އެ މެޗު ކާމިޔާބުކޮށް އިންގްލެންޑުން ވަނީ ފުރަތަމަ ފަހަރަށް ދުނިޔޭގެ ޗެމްޕިއަންކަން ހޯދާފަ އެވެ. މި މުބާރާތަކީ ފުޓްބޯޅަ އެތައް ގޮތަކުން ބަދަލުކޮށްލި، ފޯރިގަދަ އަދި ތަފާތު ހާދިސާތަކުން ފުރިގެންވި މުބާރާތެކެވެ.