ކޮލަމްބިއާ ވަނީ މީގެ ކުރިން ފަސް ފަހަރު ވޯލްޑް ކަޕްގައި ކުޅެފަ އެވެ. އެންމެ ބޮޑު ކާމިޔާބީއަކީ 2014 ވަނަ އަހަރުގެ ކުއާޓާ ފައިނަލުގައި ވާދަކުރުމެވެ. އޭގެފަހުން 2018 ވަނަ އަހަރުގެ ވޯލްޑް ކަޕްގެ ގަދަ 16 އިން ފުރުސަތު ހޯދި އެވެ. އެކަމަކު އެންމެ ފަހުގެ ވޯލްޑް ކަޕުން އެ ގައުމަށް ފުރުސަތެއް ނުލިބުނެވެ.

ގަތަރުގައި ބޭއްވި ވޯލްޑް ކަޕްގެ ފުރުސަތު ގެއްލުމާ އެކު ފުޓްބޯޅަ އަލުން ކޮޅަށް ޖެހުމުގެ މަސައްކަތް އެގައުމުން ފެށި އެވެ. މިދިޔަ މުއްދަތުގައި ކޮލަމްބިއާ އަކީ ދެކުނު އެމެރިކާ ފުޓްބޯޅައިގައި އެންމެ ކުރިއެރުން ހޯދި އެއް ގައުމެވެ.

ކޮލިފައިންގައި ކޮލަމްބިއާ ވަނީ 28 ޕޮއިންޓާ އެކު ދެކުނު އެމެރިކާ ގްރޫޕުގެ އެއް ވަނަ ހޯދައިފަ އެވެ. ހަތް މެޗުން މޮޅުވެ ހަތް މެޗު އެއްވަރުވިއިރު ހަތަރު މެޗުން ބަލިވި އެވެ.

ކާމިޔާބީ އަށް ބަލާއިރު ކޮލަމްބިއާ ވަނީ 2001 ވަނަ އަހަރުގެ ކޮޕާ އެމެރިކާގެ ޗެމްޕިއަންކަން ހޯދައިފަ އެވެ. އެންމެ ފަހުގެ ކޮޕާ އެމެރިކާ ފައިނަލަށް ދަތުރުކޮށް ބަލިވީ އާޖެންޓީނާއާ ވާދަކޮށެވެ. 

ކޯޗު: ނެސްޓޯ ލޮރެންޒޯ (60 އަހަރު)

ނެސްޓޯ ލޮރެންޒޯ ކޮލަމްބިއާގެ ކޯޗުކަމާ ހަވާލުވީ 2022 ވަނަ އަހަރު އެވެ. އޭގެ ކުރިން އާޖެންޓީނާގެ އެސިސްޓެންޓް ކަމާއި ކޮލަމްބިއާގެ އެސިސްޓެންޓްކަން ވެސް ކުރި އެވެ. ލޮރެންޒޯގެ ކޯޗުކަމުގައި 2024 ޖުލައި މަހާ ހަމައަށް ބަލިނުވެ 28 މެޗު އެގައުމުން ފުރިހަމަކުރި އެވެ. މި މުއްދަތުގައި ޖަރުމަނާއި ބްރެޒިލްގެ އިތުރުން އުރުގުއޭ އަދި ސްޕެއިން ވެސް ބަލިކުރި އެވެ. އަދި 23 އަހަރަށް ފަހު ކޮޕާ އެމެރިކާގެ ފައިނަލުން 2024 ވަނަ އަހަރު ޖާގަ ހޯދަމަކީ ވެސް ލޮރެންޒޯގެ ކޯޗުކަމުގައި އެ ގައުމުން ހޯދި ކާމިޔާބީއެކެވެ. 

މުހިއްމު ކުޅުންތެރިން

ކޮލަމްބިއާގައި އެންމެ ފާހަގަކޮށްލެވޭ ކުޅުންތެރިއަކީ ކެޕްޓަން ހަމެސް ރޮޑްރިގޭޒް އެވެ. އުމުރުން މިހާރު 34 އަހަރުގެ ރޮޑްރިގޭޒް ވަނީ މިފަހަރުގެ ކޮލިފައިންގައި ހަތް ގޯލު ޖަހަން އެހީތެރިވެދީ އާޖެންޓީނާ އާއި ބޮލީވިއާ ކޮޅަށް މުހިއްމު ގޯލުތަކެއް ޖަހައިދީފަ އެވެ.

ކޮލަމްބިއާ ޓީމުގެ އެޓޭކުގައި ލުއިޒް ޑިއާޒްގެ ދައުރު ވެސް މުހިއްމު ވާނެ އެވެ. ކޮލިފައިންގައި ޑިއާޒް ހަތް ގޯލު ޖެހި އެވެ. ސެންޓްރަލް މިޑްފީލްޑުގައި ކުޅޭ ރިޗާޑް ރިއޯސް އާއި ކްރިސްޓަލް ޕެލެސް އަށް ކުޅެމުން އަންނަ ދެ ކުޅުންތެރިން ކަމަށްވާ ޑެނިއެލް މުންޔޮޒް އާއި ޖެފަސަން ލާމާ އަކީ ވެސް މުހިއްމު ކުޅުންތެރިންނެވެ.