ލުޒްނިކީ ސްޓޭޑިއަމް

މި އަަހަރުގެ ވޯލްޑް ކަޕް ހުޅުވާ މެޗާއި ފައިނަލް މެޗު ކުޅޭ މޮސްކޯގެ ލުޒްނިކީ ސްޓޭޑިއަމަކީ ރަޝިއާގެ އެންމެ މަޝްހޫރު ސްޓޭޑިއަމެވެ. އޭގެ އެންމެ ބޮޑު ސަބަބަކީ 2008 ގެ ޗެމްޕިއަންސް ލީގު ފައިނަލް ކުޅެފައިވުމެވެ. ރަޝިއާގެ މަހުޖަނު ރޯމަން އަބްރަހަމޮވިޗުގެ ޗެލްސީ އެ ފަހަރު މެންޗެސްޓާ ޔުނައިޓެޑް އަތުން ބަލިވީ އެވެ. އެ މެޗުގެ އިތުރުން 1980 ވަނަ އަހަރުގެ އޮލިމްޕިކްސް އާއި 2013 ވަނަ އަހަރުގެ އެތުލެޓިކްސް ވޯލްޑް ޗެމްޕިއަންޝިޕް ވެސް މި ސްޓޭޑިއަމްގައި ބޭއްވި އެވެ.

ސެންޓްރަލް ސްޓޭޑިއަމް

މިއީ މި ފަހަރުގެ ވޯލްޑް ކަޕުގައި ބޭނުންކުރާ ސްޓޭޑިއަމްތަކުގެ ތެރެއިން ދެ ވަނަ އަށް ޖާގަ އެންމެ ކުޑަ ސްޓޭޑިއަމެވެ. މިތަނުގެ ޖާގަ އިތުރުކުރީ ވެސް ފީފާގެ އެދުމަކަށް ވޯލްޑް ކަަޕަށް ހާއްސަކޮށްގެންނެވެ. އަދި މިއީ އޭޝިއާ ސަރަހައްދުގައި މިފަހަރުގެ ވޯލްޑް ކަޕުގެ ހަރަކާތް ހިނގާނެ ހަމައެކަނި ސްޓޭޑިއަމެވެ. މި ތަން 1957 ގައި ބިނާކުރި ފަހުން ދެ ފަހަރެއްގެ މަތިން އާކޮށްފައިވެ އެވެ.

ކްރެސްޓޮވްސްކީ ސްޓޭޑިއަމް

ރަޝިއާގެ ފުޓްބޯޅައިގެ ގަދަބާރު ޒެނިތު ސެއިންޓް-ޕީޓާސްބާގަށް ނިސްބަތްވާ މި ސްޓޭޑިއަމަކީ އެއް ބިލިއަން ޑޮލަރު ހޭދަކޮށްގެން ބިނާކޮށް މިދިޔަ އަހަރު ހުޅުވި ސްޓޭޑިއަމެކެވެ. އެހެންވެ މިއީ ދުނިޔޭގައި މިހާތަނަށް ބިނާކުރި އެންމެ އަގުބޮޑު އެއް ސްޓޭޑިއަމެވެ. މިއީ މި ފަހަރުގެ ވޯލްޑް ކަޕުގެ ދެ ވަނަ އަށް އެންމެ މުހިއްމު ސްޓޭޑިއަމެވެ.

ފިޝްޓް އޮލިމްޕިކް ސްޓޭޑިއަމް

ބްލެކް ސީގެ އައްސޭރި ފަށުގައި އޮންނަ ސޯޗީގައި ބިނާކޮށްފައިވާ ފިޝްޓް އޮލިމްޕިކް ސްޓޭޑިއަމަކީ ސޯޗީގެ އޮލިމްޕިކް ޕާކުގެ މުހިއްމު ބައެކެވެ. މި ސްޓޭޑިއަމަށް އެނަން ދީފައި ވަނީ ފިޝްޓް ފަރުބަދައިގެ ނަމާ ގުޅުވައިގެންނެވެ. ޖުމްލަ 40،00 މީހުންގެ ޖާގައިގެ މި ސްޓޭޑިއަމް ބިނާކޮށްފައިވަނީ 2014ގެ ވިންޓާ އޮލިމްޕިކްސް އާއި ޕެރެލިމްޕިކްސް އަށެވެ. އެ ދެ ގޭމްސް ހުޅުވުމުގެ ރަސްމިއްޔާތާއި ނިންމުމުގެ ރަސްމިއްޔާތު ވެސް ބޭއްވީ އެ ސްޓޭޑިއަމުގަ އެވެ.

ކަޒާން އެރީނާ

ރަޝިއާގެ ކްލަބްތަކުގެ ތެރެއިން ޔޫރަޕުގައި ވެސް މަޝްހޫރު ރުބިން ކަޒާން އަށް ނިސްބަތްވާ ކަޒާން އެރީނާ އަކީ 450 މިލިއަން ޑޮލަރު ހޭދަކޮށްގެން ބިނާކޮށް 2013 ގައި ހުޅުވި ސްޓޭޑިއަމެކެވެ. މިއީ ވެސް ޔުއެފާގެ ކެޓަގަރީ ހަތަރެއްގެ ފެންވަރުގެ ސްޓޭޑިއަމެކެވެ. ކޮންފަޑެރޭޝަންސް ކަޕުގެ ސެމީ ފައިނަލް ކުޅުނު މި ސްޓޭޑިއަމުގައި ވޯލްޑް ކަޕުގެ ހަ މެޗު އޮންނާނެ އެވެ.

އޮޓްކްރިޓޭ އެރީނާ

މިއީ 430 މިލިއަން ޑޮލަރު ހޭދަކޮށް 2014 ގައި ހެދި ސްޓޭޑިއަމެކެވެ. މި ސްޓޭޑިއަމް ބޭނުންކުރަނީ ރަޝިއާގެ މަޝްހޫރު ކްލަބް ސްޕާޓަކް މޮސްކޯ އާއި ރަޝިއާ ގައުމީ ޓީމުންނެވެ. މިއީ ޖާގައިގެ ގޮތުން ބަލާއިރު ނިސްބަތުން ކުޑަ ސްޓޭޑިއަމެކެވެ. އެކަމަކު ޔުއެފާގެ ކެޓަގަރީ ހަތަރަކަށް ފެތޭ ޒަމާނީ ސްޓޭޑިއަމެކެވެ. މިދިޔަ އަހަރުގެ ފީފާ ކޮންފަޑެރޭޝަންސް ކަޕުގެ މެޗުތައް ވެސް މިތަނުގައި ބާއްވާފައިވެ އެވެ.

މޯޑޮވިއާ އެރީނާ

ރަޝިއާގެ ތިން ވަނަ ޑިވިޝަނުގެ އެފްސީ މޯޑޮވިއާ ސަރަންސްކުން ބޭނުންކުރަމުން އައި ސްޓާޓް ސްޓޭޑިއަމުން ދެން ފެންނާނީ މި ފެންވަރު ރަނގަޅު ސްޓޭޑިއަމެވެ. މިއީ ވޯލްޑް ކަޕަށް ހާއްސަކޮށްގެން 300 މިލިއަން ޑޮލަރު ހޭދަކޮށްގެން އިމާރާތްކުރި ތަނެކެވެ. ބިނާކުރަން އަށް އަހަރު ނެގި އެވެ.

ކަލިނިންގްރަޑް ސްޓޭޑިއަމް

މި ފަހަރުގެ އެންމެ ކުޑަ ސްޓޭޑިއަމަށް މި ތަން ވީ ނަމަވެސް ޑިޒައިން ވަރަށް ރީއްޗެވެ. އެންމެ 35،212 މީހުންގެ ޖާގައިގެ މި ސްޓޭޑިއަމް، 257 މިލިއަން ޑޮލަރު ހޭދަކޮށްގެން، ހެދީ ސީދާ ވޯލްޑް ކަޕަށެވެ. މިތަން ބިނާކޮށްފައިވަނީ ޕޮލެންޑް-ރަޝިއާ ބޯޑަރާ ކައިރީގަ އެވެ. މާނައަކީ މިތަން ވެގެންދާނީ ވޯލްޑް ކަޕުގެ ސްޓޭޑިއަމްތަކުގެ ތެރެއިން ޔޫރަޕިއަން ޔޫނިއަންގެ ސަރަހައްދާ އެންމެ ކައިރީގައިވާ ސްޓޭޑިއަމަށެވެ.

ކޮސްމޮސް އެރީނާ

މި އަހަރުގެ އޭޕްރިލް މަހު ހުޅުވި ކޮސްމޮސް އެރީނާ އަކީ ވޯލްޑް ކަޕުގެ މެޗުތައް ކުޅޭ އެންމެ ކުޑަ އެއް ސްޓޭޑިއަމެވެ. އެކަމަކު ފަރުމާ އަށް ބަލާއިރު މިއީ އެންމެ ހިތްގައިމު އެއް ސްޓޭޑިއަމަށް ވާނެ އެވެ. ހާއްސަކޮށް މި ސްޓޭޑިއަމުގެ ފުރާޅު ފަރުމާކޮށްފައިވަނީ ތަފާތު ގޮތަކަށެވެ. މި ސްޓޭޑިއަމުގެ އަގަކީ 320 މިލިއަން ޑޮލަރެވެ.

ރޮސްޓޯފް އެރީނާ

ހަތަރު އަހަރުގެ މަސައްކަތުން ބިނާކޮށް މި އަހަރު ހުޅުވި ރޮސްޓޯފް އެރީނާ އަކީ ނިސްބަތުން ކުޑަ ނަމަވެސް ރީތި ސްޓޭޑިއަމެކެވެ. މިތަން ވެގެންދާނީ މި ސިޓީގެ އާ ސެންޓްރަލް ސަރަހައްދަށެވެ. މިތަނާ އެކު މި ސަރަހައްދު ތަރައްގީވެގެންދާނެ އެވެ. ވޯލްޑް ކަޕުގެ މެޗުތަކުގެ އިތުރުން ރަޝިއަން ޕްރިމިއާ ލީގުގައި އެފްސީ ރޮސްޓޯފްގެ ހޯމް ސްޓޭޑިއަމަކީ ވެސް މިތަނެވެ.

ނިޒްނީ ނޮވްގޮރޮޑް ސްޓޭޑިއަމް

މި ސްޓޭޑިއަމް ފަރުމާކޮށްފައި ވަނީ ވޮލްގާ ސަރަހައްދުގެ ގުދުރަތީ މާހައުލާ ގުޅޭ ގޮތަށެވެ. ބޭނުންކޮށްފައިވަނީ ހުދު ކުލަ އާއި ނޫ ކުލަ އެވެ. ސްޓޭޑިއަމުގެ ކޮންކްރީޓް ބައި ވަރަށް ބޮޑެވެ. ބޭރުން ބަލާއިރު ސްޓޭޑިއަމަކަށް ވުރެ ވައްތަރީ ކޮންފަރެންސް ކުރާ ތަނަކާ އެވެ. މިތަނުގެ މަސައްކަތް 2015 ގައި ފަށައި، މުޅިން ނިންމުމަށް ފަހު ހުޅުވީ މި އަހަރު ސީދާ ވޯލްޑް ކަޕަށެވެ.

ވޮލްގޮގްރަޑް އެރީނާ

ކުރީގެ ސެންޓްރަލް ސްޓޭޑިއަމް ތަޅާލުމަށް ފަހު އެޅި ވޮލްގޮގްރަޑް ސްޓޭޑިއަމަކީ ވޯލްޑް ކަޕަށް ރަޝިއާ އިން ކުރަމުން އަންނަ މަސައްކަތް ރަމްޒުކޮށްދޭ ތަނެކެވެ. ހުދާއި ނޫ ކުލަ ބޭނުންކޮށްގެން ފަރުމާކޮށްފައިވާ ހިތްގައިމު ފުރާޅެއް ލާފައިވާ މި ސްޓޭޑިއަމް ހަދާފައިވަނީ ވޮލްގާ ކޯރުގެ އައްސޭރީގަ އެވެ. ދެ ހަރުފަތް ބަރިއަކަށް، ޖުމްލަ 45،000 މީހުންގެ ޖާގަ ހިމެނޭ މި ސްޓޭޑިއަމުގެ ޖާގަ 35،000 އަށް މަދުކުރާނެ އެވެ.

ސްޕާޓަކް ސްޓޭޑިއަމް މޮސްކޯ

ސެއިންޓް ޕީޓާސްބާގް ސްޓޭޑިއަމް